Qoǵamdyq uıym ókilderi medıtsınalyq áleýmettik mekeme basshysy bola alady
Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti málimet taratty.
Ózgeris vedomstvo basshysynyń «Halyqty áleýmettik qorǵaý jáne jumyspen qamtý uıymdarynyń basshylary, mamandary men basqa da qyzmetshileri laýazymdarynyń úlgilik biliktilik sıpattamalaryn bekitý týraly» № 360 buıryǵyna enip otyr.
Medıtsınalyq-áleýmettik mekemelerdiń dırektorlaryna qoıylatyn biliktilik talaptaryn qaıta qaraý týraly usynys Áleýmettik jumystyń basym baǵyttary týraly vedomstvoaralyq keńestiń aqpan aıyndaǵy otyrysynda aıtylǵan eken. Bastama ıeleri saladaǵy qıyndyqtardy saýatty qaýzap, qordalanǵan problemalardy sheshýdiń jolyn usynyp júrgen belsendi adamdardyń biliktilik talaptaryna saı bolmaǵandyqtan, medıtsınalyq áleýmettik mekeme dırektory bola almaıtynyn másele etip kótergen.
«Shetelderdiń tájirıbesi medıtsınalyq-áleýmettik mekemelerdiń dırektorlarlyǵyna basqa salalarda basshylyq ótili bar qyzmetkerler taǵaıyndalatynyn kórsetedi. № 360 buıryqqa engizilgen ózgerister boıynsha endi medıtsınalyq áleýmettik mekeme dırektorlyǵyna bilim berý, densaýlyq saqtaý, mádenıet jáne sport salalaryndaǵy úkimettik emes jáne memlekettik emes uıymdardy keminde 5 jyl basqaryp kórgen qyzmetkerler taǵaıyndalýy múmkin», - delingen veodmstvonyń baspasóz qyzmeti taratqan aqparatta.
Vedomstvo mamandarynyń aıtýynsha, bul túzetýler keıbir óńirlerde baıqalatyn bilikti jáne myqty basshylarǵa qatysty kadrlyq daǵdarysty sheshýge múmkindik bermek.
«Medıtsınalyq áleýmettik mekemege halyqpen jumys isteýde mol tájirıbesi bar qoǵamdyq birlestikterdiń mamandaryn tartý kórsetiletin qyzmetterdiń sapasyna da oń áserin tıgizedi. Ózin tıimdi basqarýshy retinde kórsetken qoǵamdyq uıymdardyń kóshbasshylaryn medıtsınalyq-áleýmettik mekemelerdi basqarýǵa tartý barynsha ashyqtyqty qamtamasyz etýge kómektesedi», – deıdi Eńbek jáne halyqty áleýmettik qorǵaý vıtse-mınıstri Erlan Áýkenov.