Qoǵamdyq top aqtóbelik jastarǵa latynǵa kóshýdiń mańyzdylyǵyn túsindirdi
Aqtóbedegi joǵary oqý oryndarynda bilim alyp júrgen belsendi stýdentter búgin latyn álipbıine kóshý jolyndaǵy negizgi qadamdarmen tanysty. Qoǵamdyq top músheleri jastarmen kezdesip, olardyń oıyn bildi.
«Táýelsizdik alǵannan beri qoǵamda qazaq tilin kırıllıtsadan latynǵa kóshirý týraly oılar aıtyldy. 2006 jyly Elbasy Nursultan Nazarbaev óz sózinde ıdeıany jarııa etip, qoǵam aldyna qoıdy. Sodan beri 11 jyl ótti. Al «Bolashaqqa baǵdar: rýhanı jańǵyrý» maqalasynda ıdeıa naqty formasyna ıe bolyp, qazir qujattar qabyldanyp jatyr. Bul úlken protsess. Birinshiden, latyn álipbıine kóshý jóninde saıası sheshim qabyldanýy durys. Ekinshiden, naqty nusqasy, grafıka, úlgisine qoǵam óz pikirin aıta alady. Men latyn álipbıine kóshýdi qoldaımyn. Qazaqtyń táýelsizdigi, jer tutastyǵy, tili, dili, qazaqtyń geosaıası álemdegi orny degende barshamyz birge bolýymyz tıis. Bastysy, jastar qoldaýy kerek»,- dedi saıasatker Ámirjan Qosanov.
Kezdesý kezinde ulttyq qundylyq, latyn álipbıine kóshý jumystarynyń alǵysharttary týraly aıtyldy. Jańa álipbıdi engizý úshin aldymen memlekettik komıssııa qurylyp, fılologtar men áleýmettanýshylar, qoǵam qaıratkerleri men saıasatkerler jan-jaqty talqyǵa salady.
«Latyn álipbıi - ulttyń birigý modeli. Elbasy Nursultan Nazarbaev Jarlyqqa qol qoıǵan soń halyqpen kezdesýge shyǵyp, Aqtóbede jastarmen júzdesýdi jón kórdik. Túıgenimiz, jastarymyz latyn álipbıin qoldaıdy. Biraq latyn álipbıin engizýdiń ádisteri men tásilderi jónindi suraqtar bar. Dıgraf, apostrof máselesi nazarda tur. Biz latyn álipbıin engizý keshendi jumys ekenin bilemiz. Elbasy Nursultan Nazarbaev Úkimetke memlekettik komıssııa qurýdy tapsyrdy. Ol komıssııa quramynda fılologtar, áleýmettanýshylar, saıasattanýshylar sekildi bilikti mamandar bolady. Olar qazaq tiliniń ózindik ereksheligine nazar aýdarady»,- dedi saıasattanýshy Erlan Saırov.
Kezdesý kezinde Saqtaǵan Báıishev atyndaǵy Aqtóbe ýnıversıtetiniń, Q.Jubanov atyndaǵy Aqtóbe óńirlik memlekettik ýnıversıtetiniń stýdentteri óz qoldaýlaryn jetkizdi. Joǵary oqý ornynyń stýdenti Nazerke Tursynálıeva oqytýshylary arnaıy semınar ótkizip, latyn álipbıine kóshýdiń utymdy tustary týraly jan-jaqty aqparat bergenin aıtty.
«Joǵary oqý oryndarynyń fılologııa fakýltetterinde latyn álipbıine kóshýdiń joldary men bul sheshimniń mańyzy týraly aıtylady. Biraq tehnıkalyq fakýltet stýdentterine de dál osyndaı kezdesýler qajet. Tehnıka men tehnologııa latyn álipbıine kóshse, damý jolymyz aıqyndala túsedi. Biz óz qoldaýymyzdy bildiremiz»,- dedi stýdent. Qoǵamdyq top músheleri stýdentterdi aýylǵa baryp, zamandastarymen pikirtalas kezinde latyn álipbıine kóshýdiń mańyzdylyǵyn túsindirýge úles qosýǵa shaqyrdy.
