Qoǵamdyq tamaqtaný kásiporyndary qantpen qamtylady - mınıstrlik
«Aýyl sharýashylyǵy mınıstrligi qanttyń qosymsha kólemin Nur-Sultan, Almaty jáne Shymkent qalalaryna jóneltedi. Osy qalalardaǵy shaǵyn bıznes ókilderi qanttyń qajetti kólemin ala alady. Sondaı-aq, Qaýymdastyq basqa qalalar boıynsha tizim jasap, qajetti qant kólemin esepteıdi. Bul oraıda, Qaýymdastyq pen ákimdikter atalǵan qantty berý algorıtmin ázirleıdi», - dedi aýyl sharýashylyǵy vıtse-mınıstri Jeńis Óserbaı vedomstvoda ótken keńeste.
Aıta ketsek, Aýyl sharýashylyǵy mınıstrliginde Saýda jáne ıntegratsııa mınıstrligi, Nur-Sultan ákimdigi men Qoǵamdyq tamaqtaný qaýymdastyǵy ókilderiniń qatysýymen bıznes sýbektilerin qanttyń qajetti kólemimen qamtamasyz etý máseleleri boıynsha kezdesý ótti.
Buǵan deıin Qoǵamdyq tamaqtaný qaýymdastyǵy qantpen qamtamasyz etýdegi qıyndyqtarǵa baılanysty qoǵamdyq tamaqtaný kásiporyndarynyń bankrotqa ushyraýy múmkin ekenin málimdegen bolatyn.
Talqylaý qorytyndysy boıynsha shaǵyn jáne orta bıznesti qosymsha qoldaý jáne qoǵamdyq tamaqtaný obektileriniń ındýstrııalyq qant qajettiligin tolyq qamtamasyz etý týraly sheshim qabyldandy.
Qoǵamdyq tamaqtaný obektilerine basymdyq bere otyryp, qant jetkizýdi uıymdastyrý úshin búgingi kúnniń ishinde olarǵa qajetti qant kólemi aıqyndalady. Birinshi kezekte halyq sany neǵurlym kóp úsh aımaqqa myń tonnadan astam qant jetkiziletin boldy.
Foto: primeminister.kz
