Qoǵamdyq shtab Jambyl oblysyn aralap, Konstıtýtsııaǵa engiziletin ózgeristerdi túsindiredi

TARAZ. QazAqparat – Jambyl oblysynda Konstıtýtsııalyq referendýmdy qoldaý jóninde 47 adamnan turatyn qoǵamdyq shtab quryldy, dep habarlaıdy QazAqparat tilshisi.

Shtabtyń quramyna aımaqtaǵy zııaly qaýym ókilderi, ardagerler keńesiniń músheleri, úkimettik emes uıym jetekshileri, BAQ ókilderi jáne jastar uıymdarynyń kóshbasshylary men ǵalymdar endi. Bul týraly Óńirlik kommýnıkatsııalar qyzmetiniń baspasóz alańynda ótken brıfıngide Referendýmdy qoldaý jónindegi qoǵamdyq shtabtyń tóraǵasy Amangeldi Karentaev aıtty

Ol aldaǵy ýaqytta shtab músheleri óńirdiń eldi mekenderinde, iri kásiporyndar men ujymdarda Konstıtýtsııaǵa engiziletin ózgerister boıynsha túsindirý jumystaryn júrgizetinin jetkizdi.

«Túsindirý jumystaryn sapaly júrgizý maqsatynda jer, aýyl sharýashylyǵy salasy, zańgerler, ekonomıster men til mamandary bar 17 adamnan turatyn sarapshylar pýly jasaqtaldy. Sondaı-aq shtab janynan BAQ-pen jumys júrgizetin, monıtorıng, kreatıv syndy toptar quryldy.

Túsindirý jumystaryn júıeli júrgizý úshin oblystyq arnaıy jelilik keste jasaldy. Jelilik kestege sáıkes 6 mamyr men 3 maýsym aralyǵynda Taraz qalasy men aýdandarda 611 is-shara ótkizý josparlanyp otyr», – dedi spıker.

Onyń aıtýynsha, is-sharalardyń basym bóligi Konstıtýtsııaǵa engiziletin ózgeristerdi túsindirýge baǵyttalatyn bolady.