Qoǵamdyq sanany jańǵyrtý boıynsha nasıxat toptary jasaqtalýy múmkin
ASTANA. QazAqparat - Búgin Qazaqstan xalqy Assambleıasy ǵylymı-sarapshylyq keńesiniń músheleri Prezıdenttiń "Bolashaqqa baǵdar: rýxanı jańǵyrý" maqalasyn talqylady. Otyrys barysynda qoǵamdyq sanany jańǵyrtý jónindegi ulttyq komıssııanyń múshesi, professor Anatolıı Bashmakov óz usynystaryn ortaǵa saldy, dep xabarlaıdy QazAqparat tilshisi.
"Keshe ǵana bizdi, komıssııa múshelerin, Prezıdent Ákimshiliginde jınady. Men ózim patrıotızmdi damytýmen aınalysatyn jumys tobyna múshe boldym. Dál osy top komıssııanyń bazalyq qurylymy bolatyn sııaqty. Sebebi ol el-jer, týǵan el, patrıotızm máselelerimen aınalysady. Men ózim arnaıy nasıxat toptaryn qurýdy usyndym. Biz aımaqtarǵa baryp, sanany jańǵyrtýdyń mańyzdylyǵyn xalyqqa jetkizýimiz kerek", - deıdi Bashmakov.
Onyń aıtýynsha, aımaqtardy aralaıtyn adamdardy irikteý kerek. Olar rýxanı jaǵynan baı ári sózge sheshen bolýy shart. "Ol adam qarapaıym xalyqqa qazirgi aýqymdy bastamanyń mańyzdylyǵyn túsinikti tilde jetkize bilýi kerek. Jaı aıtyp qana qoımaı, ony shyn júrekten túsindirse, quba-qup. Sebebi "adamnyń sanasyn ózgertkennen atomnyń qupııasyn ashqan jeńil" degen bir sóz bar. Mine, osy sózdiń ózi bizdiń qolǵa alyp jatqan jumysymyzdyń qanshalyqty aýyr ekenin kórsetse kerek. Sondyqtan aımaqtarǵa jiberetin adamdar ıntellektýaldy jaǵynan ozyq, óz tarıxyn, mádenıeti men tilin jaqsy bilýi kerek. Olar árbir aýylǵa baryp, el ómirine ımpýls berýi tıis", - dep atap kórsetti ǵalym.
