«Qoǵamdyq pikir» zertteý ınstıtýty saılaý kúninde ekzıt-poll júrgizedi
ASTANA. QazAqparat - «Qoǵamdyq pikir» zertteý ınstıtýty saılaý kúninde ekzıt-poll júrgizedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte atalǵan ınstıtýttyń atqarýshy dırektory Aıgúl Sádýaqasova málim etti.
«Bizdiń elde úlken saıası naýqan júrip jatyr. Onyń nátıjesinde 20 naýryz kúni Májilis jáne máslıhattarǵa depýtattar saılanady. Osy kúni «Qoǵamdyq pikir» zertteý ınstıtýty óziniń zertteýin ótkizip, saılaý ýchaskelerinen shyqqan saılaýshylarǵa saýalnama júrgizedi. Bul standartty ádis, Qazaqstanda da, jalpy barlyq elde osyndaı tájirıbe bar»,- dedi ol.
Onyń atap ótýinshe, atalǵan zertteý ádisine sáıkes, árbir 5-shi saılaýshy saılaý ýchaskesinen daýys berip shyqqannan keıin saýalnamaǵa jaýap beredi.Saýalnamaǵa Qazaqstannyń barlyq oblys ortalyqtary, Astana men Almaty qalalarynyń saılaýshylary qatysady. Jalpy respýblıka boıynsha 110 saılaý ýchaskesi qamtylady.
«Olardyń arasynda mindetti túrde oblys ortalyqtary jáne Almaty men Astana qalasynda 56 ýchaske, kishi qalalarda 28 ýchaske jáne aýyldyq okrýgtarda 26 ýchaske iriktelip alynady. Sonda biz Qazaqstan boıynsha reprezentatıvti nátıjeni kórsete alamyz dep oılaımyz. Barlyq nátıjeler jalpylama túrde kúnniń sońynda beriledi jáne zańmen bekitilgen erejelerge saı bolady. Zertteýge qatysatyn 200-ge jýyq suhbat berýshiler Qazaqstannyń barlyq óńirin qamtıdy. Saýalnama nátıjesi buqaralyq aqparat quraldaryna 20 naýryzdan 21 naýryzǵa qaraǵan túngi saǵat 00-00-de jetkiziledi»,- dedi A.Sádýaqasova.
