Qoǵamdyq Palatanyń kezekti otyrysynda Elbasy Joldaýynda qamtylǵan máseleler talqylanbaq
ASTANA. Aqpannyń 18-i. QazAqparat /Qanat Mámetqazyuly/ - Erteń, aqpannyń 19-ynda QR Parlamenti Májilisi janyndaǵy Qoǵamdyq palatanyń kezekti otyrysy ótedi. Onda Qazaqstan Prezıdenti Nursultan Nazarbaevtyń «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty halyqqa arnaǵan Joldaýyn zańnamalyq qamtamasyz etýdegi Qoǵamdyq Palatanyń róli máselesin talqylaý josparlanýda,
dep habarlaıdy QazAqparat.
Sonymen birge, jıyn barysynda Elbasy joldaýynan týyndaıtyn máseleler retinde «Quqyq qorǵaý júıesin reformalaý jáne onyń odan ári izgilenýi» taqyrybynda Qoǵamdyq Palata tóraǵasynyń orynbasary Maqsut Nárikbaevtyń, «Densaýlyq saqtaý salasynyń jaqsarýy - ómir súrý sapasynyń artýy» taqyryby boıynsha Densaýlyq saqtaý mınıstri, Qoǵamdyq Palatanyń múshesi, áleýmettik-mádenı damý jónindegi sektsııanyń jetekshisi Jaqsylyq Dosqalıevtiń sóz sóıleıdi. Budan bólek, Qoǵamdyq Palatanyń múshesi, qarjy-ekonomıkalyq reforma jáne aımaqtyq damý sektsııasynyń jetekshisi, ekonomıka ǵylymdarynyń doktory Orazaly Sábden «Ekonomıkany ártaraptandyrý - tabysqa jetýdiń kilti», sondaı-aq Qoǵamdyq Palatanyń múshesi, demokratııalandyrý jáne azamattyq qoǵamdy damytý máseleleri jónindegi sektsııanyń jetekshisi Altynshash Jaǵanova «Іshki saıası turaqtylyq - 2020 Strategııalyq jospardy júzege asyrýdyń senimdi irgetasy» taqyryptary negizinde baıandama jasaıdy. Otyrystyń baǵdarlamasyna sáıkes Qoǵamdyq Palatanyń múshesi, ekologııa, aýyl sharýashylyǵy jónindegi sektsııanyń jetekshisi Mels Eleýsizovtiń «Klımattyń jahandyq ózgerýi jaǵdaıyndaǵy eldiń turaqty damýyndaǵy aýyl sharýashylyǵynyń róli» taqyryby boıynsha sóz sóıleıtini belgilenip otyr.
Sonymen qatar, Qoǵamdyq Palatanyń otyrysynan keıin Orazaly Sábdenniń «Ekonomıka» atty 10 tomdyq tańdaýly eńbekteriniń tanystyrylymy ótetini kózdelýde.
