Qoǵamdyq Palatanyń eki jylǵy qyzmeti saralandy
ASTANA. Qańtardyń 21-i. QazAqparat - Búgin Oral Muhamedjanovtyń jetekshiligimen ótken Májilis Bıýrosynyń otyrysynda QR Parlamenti Májilisiniń janyndaǵy Qoǵamdyq Palatanyń 2007 jylǵy qarasha - 2009 jylǵy jeltoqsan aralyǵyndaǵy qyzmeti týraly málimet tyńdaldy.
Bul jóninde Májilis Tóraǵasynyń orynbasary, Qoǵamdyq Palatanyń jetekshisi Sergeı Dıachenko baıandap berdi, dep habarlaıdy QazAqparat.
Qoǵamdyq Palata bergen 337 usynystyń 105-i Májilis depýtattary jumys toptarynda qarap, túzetýlerdi eskergen. 66 usynys Elbasy qol qoıǵan 13 zańnyń normalarynda qabyldanǵan.
Memleket basshysynyń 2009 jylǵy 6 naýryzdaǵy «Daǵdarystan - jańarý men damýǵa» atty Qazaqstan halqyna arnaǵan Joldaýynda halyqty jumyspen qamtý strategııasyn júzege asyrý jóninde qabyldanǵan is-sharalar týraly QR Eńbek jáne halyqty áleýmettik qorǵaý mınıstri Gúlshara Ábdihalyqova Qoǵamdyq Palatany habardar etti.
Qoǵamdyq Palatanyń otyrystaryndaǵy kún tártibine shyǵarylǵan máselelerdi talqylaýǵa 500-den astam shaqyrylǵan laýazymdy tulǵalar qatysqan. Olardyń ishinde Úkimet músheleri, ár túrli agenttikter men komıtetterdiń basshylary, Bas prokýratýra jetekshileri, Ortalyq saılaý komıssııasynyń jáne Qazaqstan halqy Assambleıasynyń músheleri, Prezıdent Ákimshiliginiń, Joǵarǵy sottyń, qoǵamdyq birlestikter men úkimettik emes uıymdardyń ókilderi qatysty.
Atalǵan Palata músheleri Májilistiń turaqty komıtetteriniń otyrystaryna qatysyp, depýtattarmen pikir almasty.
«Máskeý qalasynda Reseı Federatsııasynyń Qoǵamdyq Palatasymen Ózara túsinistik jáne ózara is-qımyl týraly memorandýmǵa qol qoıylýy osy Palatanyń qyzmetindegi mańyzdy oqıǵa ekeni anyq. Bul qos memleket arasyndaǵy dıalogqa azamattyq qoǵamdy, ekonomıkalyq jáne qoǵamdyq uıymdardy tartý isinde orasan zor ról atqaratyn osyndaı qurylymnyń qajettigin jáne onyń mańyzyn basa kórsetip berdi»,- dedi Sergeı Dıachenko.
Esepti kezeń ishinde Qoǵamdyq Palataǵa el azamattarynan saıası jáne áleýmettik-ekonomıkalyq damýyna qatysty ondaǵan ótinishter kelip túsip, saraptaýdan ótken.
Qoǵamdyq Palata elimizdegi negizgi BAQ quraldarynda óziniń atqarǵan qyzmeti jaıly turaqty málimetter berip keledi.
