Qoǵamdyq palata zańdy tulǵalardyń qylmystyq jaýapkershiligin engizýge baǵyttalǵan zań jobasyn talqylady
ANA. 3 maýsym. QazAqparat /Qanat Mámetqazyuly/ - Búgin elordadaǵy L.Gýmılev atyndaǵy Eýrazııa ýnıversıtetiniń bas ǵımaratynda QR Parlamenti Májilisiniń janyndaǵy Qoǵamdyq Palatanyń otyrysy ótti.
Jıyn barysynda «Qazaqstan Respýblıkasynyń keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasy talqyǵa salyndy.
Esterińizge sala keteıik, Memleket basshysynyń 2009 jylǵy 2 jeltoqsandaǵy tapsyrmasyna sáıkes ázirlengen zań jobasymen Qazaqstan Respýblıkasynyń Azamattyq, Qylmystyq, Qylmystyq is júrgizý, Qylmystyq-atqarý kodeksterine jáne ózge de zańnamalyq aktilerge tolyqtyrýlar engiziledi. Atap aıtqanda, birqatar ekonomıkalyq, ekologııalyq, sybaılas jemqorlyq jáne terrorıstik qylmystary úshin zańdy tulǵalardyń qylmystyq jaýapkershiligin engizý qarastyrylǵan. Sondaı-aq zańdy tulǵalardyń qylmystary týraly ister boıynsha is júrgizý tártibin retteýge, sondaı-aq zańdy tulǵalarǵa qatysty qoldanylatyn qylmystyq jazalardy oryndaýǵa, zańdy tulǵalar úshin olardy qylmystyq jaýapkershilikke tartýǵa baılanysqan birqatar shekteýler engizýge baǵyttalǵan túzetýler engizý usynylady. «Ekonomıkalyq qylmysqa jáne sybaıles jemqorlyqqa qarsy kúres jónindegi agenttik osy zań jobasyn ázirlegen bolatyn. Aǵymdaǵy jylǵy 30-naýryzda QR Prezıdenti janyndaǵy Quqyqtyq keńeste jobanyń talqylanýy qujattyń mańyzdylyǵyn kórsetse kerek. Bul jıynda zańdy tulǵalardyń qylmystyq jaýapkershiligin qamtıtyn úlgi negizdi dep tanylǵan edi. Sonymen qatar, zań jobasyn Májiliste talqylaý barysynda zańdy tulǵalar úshin qylmystyq jaýapkershilik qarastyrýdy quptaǵandar da, qujatqa qarsylyq tanytqandar da boldy. Sondyqtan da, zań jobasy árbir qazaqstandyqtyń múddesin qozǵaıtyndyqtan, qujatty Qoǵamdyq palatanyń talqysyna shyǵarýdy jón sanadyq», - dedi jıyndy ashyp sóz sóılegen Palata tóraǵasy depýtat Vladımır Bobrov.
Toqtala ketetin jaıt, qazirgi ýaqytta zańdy tulǵalardyń qylmystyq jaýapkershiligi Frantsııada, Germanııada, Belgııada, Danııada, Japonııada, Kanadada, AQSh-ta, Ońtústik Koreıada, Gollandııada, Norvegııada, Avstrııada, Iordanııada, Lıvanda, Sırııada, Qytaıda, Úndistanda, Rýmynııada, Moldovada jáne Lıtvada belgilengen. Álemdik tájirıbe kórsetkendeı, zańdy tulǵalardyń qylmystyq jaýapkershiligin engizý ekonomıkalyq qylmysqa qarsy is-qımyldyń tıimdi tetikterin qurý qajettiliginen týyndaǵan. Jaýapkershiliktiń mundaı túri qylmystyq kórinisterden zalaldyń ornyn toltyrý deńgeıin kóteredi, sebebi zańdy tulǵalardyń qylmystyq jaýapkershiligi bar bolǵanda olarǵa tikeleı múliktik sanktsııalardy qoldanýǵa múmkindik týady.
Qoǵamdyq palatanyń talqysynan soń onyń músheleri zań jobasyna qatysty usynymdar qabyldady.
