Qoǵamdyq Palata «Ǵylym týraly» jáne «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobalaryn qaraıdy
ASTANA. Qazannyń 6-sy. QazAqparat - Qazannyń 8-i, juma kúni Astanadaǵy Nazarbaev Ýnıversıtetiniń ǵımaratynda QR Parlamenti Májilisiniń janyndaǵy Qoǵamdyq Palatanyń otyrysy ótetini kózdelýde.
Otyrysqa Qoǵamdyq Palatanyń músheleri, Parlament Májilisiniń depýtattary, Úkimettiń, sondaı-aq Bilim jáne ǵylym, Qarjy mınıstrlikteriniń, ǵylymı ortalyqtardyń, holdıngterdiń ókilderi, joǵarǵy oqý oryndarynyń rektorlary qatysady.
Májilis Tóraǵasynyń orynbasary, Qoǵamdyq Palatanyń tóraǵasy Vladımır Bobrovtyń jetekshilik etýimen ótetin otyrysta eki zań jobasynyń kún tártibine shyǵarylatyny qarastyrylýda. Atap aıtqanda, «Ǵylym týraly» jáne «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobalary qaralatyny kózdelýde.
«Ǵylym týraly» zańnyń jańa redaktsııasyn ázirleý ІІarlamenttiń tórtinshi shaqyrylymynyń 2009 jylǵy qyrkúıektiń 1-indegi III sessııasynyń ashylýynda jáne 2009 jylǵy qyrkúıektiń 4-indegi ǵylym máseleleri boıynsha ótken keńeste Memleket basshysy bergen tapsyrmalardy oryndaý qajettiligine negizdeledi. Olar ǵylymdy basqarý men ǵylymı jáne ǵylymı-tehnıkalyq qyzmetti uıymdastyrý prıntsıpterin jetildirý qajettiligimen túsindiriledi.
Al «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobasy Memleket basshysy N.Á. Nazarbaevtyń Qazaqstan halqyna 2006 jylǵy 1 naýryzdaǵy «Qazaqstannyń álemdegi básekege barynsha qabiletti 50 eldiń qataryna kirý strategııasy» jáne 2010 jylǵy 29 qańtardaǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty joldaýlaryna sáıkes ázirlengen. Osy Joldaýlarda Memleket basshysy Astanada túlekterge erekshe qabyldaý sharttary men aıryqsha qoıylatyn talaptary bar bedeldi ınjenerlik-ǵylymı oqý ornyn qurý mindetin alǵa qoıǵan edi.
«Ǵylym týraly» zań jobasy boıynsha QR Bilim jáne ǵylym mınıstri Baqytjan Jumaǵulov baıandama jasaıtyny josparlanýda. Sondaı-aq osy másele tóńireginde Qoǵamdyq Palatanyń múshesi, QR Ulttyq ǵylym akademııasynyń prezıdenti Murat Jurynovtyń jáne Májilis depýtaty, atalǵan zań jobasy boıynsha qurylǵan jumys tobynyń jetekshisi Beken Álimjanovtyń sóz sóıleıtini qarastyrylǵan. Qoǵamdyq Palatanyń múshesi, qarjy-ekonomıkalyq reforma jáne aımaqtyq damý sektsııasynyń jetekshisi, ekonomıka ǵylymdarynyń doktory Orazaly Sábden de atalǵan zań jobasy boıynsha óz pikirin ortaǵa salady.
Al «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobasynyń maqsaty týraly da QR Bilim jáne ǵylym mınıstri Baqytjan Jumaǵulovtyń baıandama jasaıtyny kózdelgen. Osy zań jobasy boıynsha «Nazarbaev Ýnıversıteti» AQ-nyń prezıdenti Aslan Sárinjipov, Májilis depýtaty, atalǵan zań jobasy boıynsha qurylǵan jumys tobynyń jetekshisi Gúlmıra Isimbaeva sóz sóıleıdi dep kútilýde. Sondaı-aq Májilis janyndaǵy Qoǵamdyq Palata Tóraǵasynyń orynbasary Maqsut Nárikbaev sóz sóıleıdi.
Qoǵamdyq Palata otyrysynyń qorytyndysynda usynymdar qabyldanatyny qarastyrylyp otyr.
