Qoǵamdyq oryndarda taratatyn naýryz kójeni ishýge bola ma - Bas sanıtar jaýaby

ASTANA. QazAqparat - QR Densaýlyq saqtaý mınıstrligi Qoǵamdyq Densaýlyq saqtaý komıtetiniń tóraǵasy - Qazaqstannyń bas sanıtary Jandarbek Bekshın Naýryz meıramyndaǵy ýlanýdyń aldyn alý jóninde birqatar keńes berdi, dep habarlaıdy QazAqparat tilshisi.

Spıkerdiń aıtýynsha, uzaqqa sozylǵan meıramnan keıin jiti ishek ınfektsııalary, tamaqtan ýlaný jaǵdaılary kóbeıedi.

"Naýryz meıramy - kóktemgi jańarý sımvoly, mahabbat, dostyq merekesi. Naýryzdy toılaǵanda kontsert qana bolmaıdy, ártúrli taǵamdar molynan ázirlenedi - naýryz kóje, baýyrsaq, et, qazy, shujyq, qýyrdaq, jent syndy tez buzylatyn ónimder bar. Ásirese, jumyrtqa men qaımaq qosylǵan salattardy, kremi bar kondıterlik ónimderdi, tartylǵan et qosylǵan bálish-rýletterdi uzaq saqtaýǵa bolmaıdy", - dedi Jandarbek Bekshın Astanada ótken baspasóz máslıhatynda.

Onyń aıtýynsha, jappaı qydyratyn oryndarda da taǵam qaýipsizdigine min bergen jón.

"Jappaı qydyratyn oryndarda jeke adamdar satatyn tamaq ónimin, ádette naýryz kóje men qymyzdy satyp almaýǵa tyrysyńyz. Daıyn ónimniń, et, taýyq eti qosylyp pisiriletin taǵamnyń, káýap, hot-dog, sendvıchtiń saqtalýyna nazar aýdaryńyz, olar tıisti temperatýrada saqtalýy, saýda ornynda mindetti túrde bolýy tıis tońazytqyshtarda saqtalýy kerek. Barlyq ónim oralǵan bolýy tıis, qaptamalarynda taǵamnyń shyǵarylǵan kúni, óndiristik kásiporyn ataýy kórsetiledi", - dedi ol.

Sonymen birge, Bas sanıtarǵa "Saýda jáne oıyn-saýyq ortalyqtarynda, alańdarda taratylatyn Naýryz kóje qanshalyqty qaýipsiz?" degen suraq qoıyldy.

"Ákimdik uıymdastyrǵan jıyndarda beriletin naýryz kóje qaýipsiz. Sebebi ony arnaıy dámhanalar men meıramhanalarda daıyndaıdy. Onda jalpyǵa taratatyn naýryz kóje jergilikti uıymdardyń jiti qadaǵalaýynan ótken. Al bir qýysta, shette belgisiz adamdar satatyn naýryz kójelerden saqtaný kerek", - dep jaýap berdi J. Bekshın.