Qoǵamdyq orynda ishimdik ishken 500-ge tarta kámeletke tolmaǵandar ustaldy
ASTANA. 25 sáýir. QazAqparat - 22 sáýirde Іshki ister mınıstrliginiń bastamasy boıynsha múddeli memlekettik organdarmen jáne qoǵamdyq uıymdarmen birlesip ótkizgen «Jasóspirim» jedel-profılaktıkalyq is-sharasy aıaqtaldy.
Bul týraly búgin Іshki ister mınıstrliginde ótken brıfıng barysynda málim boldy.
ІІM Baspasóz qyzmetiniń basshysy Nurdildá Orazdyń aıtýynsha, sharanyń maqsaty jasóspirimder jasaıtyn qylmystardy eskertý jáne olardyń aldyn alý, kámeletke tolmaǵandarǵa alkogoldik ishimdikterdi, temeki zattaryn satýdy, olardyń túngi ýaqytta oıyn-saýyq mekemelerinde jáne turǵyn úı-jaılarynan tys jerlerde zańdy ókildersiz bolý faktilerin anyqtaý bolyp tabylady. Sondaı-aq kámeletke tolmaǵandardy qoǵamǵa qarsy is-áreketter jasaýǵa tartatyn eresek adamdardy anyqtaý da kózdeledi. «Іs-sharany ótkizý kezeńinde ákimshilik quqyq buzýshylyq jasaǵany úshin 4 myńnan astam, onyń ishinde qoǵamdyq oryndarda spırt ishimdikterin ishkeni úshin 500-den astam kámeletke tolmaǵandar ishki ister organdaryna jetkizildi. Balalardy tárbıeleý boıynsha óz mindetterin oryndamaǵan 800-ge jýyq ata-ana ákimshilik jaýapkershilikke tartyldy. Kámeletke tolmaǵandardy qylmys jasaýǵa tartqany úshin 7 qylmystyq is qozǵaldy», - deıdi N. Oraz.
