Qoǵamdyq orynda birneshe ret mas kúıde júrgen reseılikke Qazaqstan aýmaǵyna 5 jyl kirýge tyıym salyndy
ShQO polıtsııa departamentiniń málimetine súıensek, tártip saqshylary óńir aýmaǵynda «Mıgrant» jedel aldyn alý sharasyn ótkizýde. Sonyń aıasynda Zaısan aýdanynda ýákiletti organnyń ruqsatynsyz jumys istep júrgen Ózbekstan Respýblıkasynyń azamaty anyqtaldy.
«Sheteldiktiń Qazaqstanda ýaqytsha turýǵa ruqsaty da bolmaǵan. QR ÁQBtK-niń eki babyn buzǵan ol sot sheshimimen el aýmaǵynan shyǵaryldy. Sondaı-aq zańǵa sáıkes sheteldik azamatqa 5 jyl merzimge Qazaqstanǵa kirýge ruqsat joq. Óz kezeginde jumys berýshi sheteldik jumys kúshin zańsyz tartqany úshin jaýapqa tartyldy. Endi ol 30 AEK mólsherinde aıyppul tóleıdi», - delingen aqparatta.
Al Shemonaıha aýdanynyń qyzmetkerleri zańdy buzǵan reseılikti anyqtaǵan. Ol birneshe ret qoǵamdyq orynda alkogoldi ishimdik ishkeni úshin ákimshilik jaýapkershilikke tartyldy. Sot sheshimimen elden shyǵarylǵan sheteldikke Qazaqstan aýmaǵyna 5 jyl kirýge tyıym salyndy.