Qoǵamdyq orynda balaǵat sóz aıtqandar laıyqty jazaǵa tartylady – mınıstr

ASTANA. QazAqparat – Іshki ister mınıstri Marat Ahmetjanov kúni keshe qatańdatylǵan qoǵamdyq oryndarda bylapyt sóz aıtqandarǵa jazanyń kúsheıýine qatysty pikir bildirdi, dep habarlaıdy QazAqparat tilshisi.

«Qoǵamdyq oryndarda aıtylǵan balaǵat sóz úshin jaýapkershilik buryn da bartuǵyn. Endigi ýaqytta ol qatańdatyldy. Aıta ketetin jaıt, biz birden balaǵat sózge mán beremiz, al negizi zań aldymen vandalızmmen kúresýdi kózdeıdi. Bizde kópqabatty turǵyn úılerdi, lıvtilerdi búldirý faktileri kóptep tirkelip keldi jáne aıyptylardy jaýapkershilikke tartý múmkindigi bolmady. Sondyqtan da búldirý, zııan keltirý áreketteri boıynsha jaýapkershilik kúsheıdi. Onyń ishinde qoǵamdyq oryndarda balaǵat sóz aıtý da bar», - dedi Marat Ahmetjanov Úkimet otyrysynan keıin jýrnalısterdiń suraǵyna jaýap bere otyryp.

Mınıstrdiń aıtýynsha, jaýapkershiliktiń kúsheıýi qoǵamnyń dóreki sózge múldem tózbeýshilik deńgeıin arttyrady.

«Endi qoǵamdyq orynda balaǵat sóz aıtqandar laıyqty jazaǵa tartylady. Sebebi kópshilik jerde bylapyt sóıleý qurmetsizdiktiń belgisi. Mysaly, men qazir balaǵat sóz aıtsam jazalaýǵa bolady, óıtkeni bul jerde kamera bar, dybys bar. Degenmen ómirde ártúrli jaǵdaı bolady. Aıtar bolsaq, baıqamaı aıaǵyna balǵany qulatyp alsa, aýzynan dóreki sóz shyǵyp ketýi múmkin. Bul qoǵamdyq tártipti buzý bolyp eseptelmeıdi», - deıdi ol.

Aıta ketsek, elimizde kesheden bastap qoǵamdyq orynda aıtylǵan balaǵat sóz úshin salynatyn aıyppul kólemi ósti.