Qoǵamdyq mańyzdy jumyspen aınalysatyndar aýysym aldynda mindetti medıtsınalyq tekserýden ótedi
ASTANA. QazAqparat - Búgin Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy.
Eske salaıyq, zań jobasy eń aldymen densaýlyq saqtaý salasyndaǵy memlekettik retteý men basqarýdy jetildirýge qatysty normalardy qamtyp otyr. Atap aıtqanda, qujat qaýipsiz, tıimdi jáne sapaly dárilik zattardyń, medıtsınalyq maqsattaǵy buıymdardyń jáne medıtsınalyq tehnıkanyń qoljetimdiligin qamtamasyz etý prıntsıpterimen tolyqtyrylǵan. Sonymen birge, Elbasynyń Jarlyǵy boıynsha memlekettik basqarý deńgeıiniń arasyndaǵy quzyrettiliktiń arajiginiń ajyratylýyna baılanysty densaýlyq saqtaý salasyndaǵy ýákiletti organnyń quzyreti jańa 20 fýnktsııamen tolyqty. Olar buryn Úkimettiń qaraýynda bolǵan edi. Budan bólek, sanıtarlyq-epıdemologııalyq qyzmettiń Ulttyq ekonomıka mınıstrligine berilýine baılanysty osy qyzmet pen densaýlyq saqtaý salasyndaǵy memlekettik organnyń qyzmetteri jeke bapqa bóliný arqyly ajyratylǵan. Jergilikti atqarýshy organdardyń jas mamandardy áleýmettik qoldaý sharalaryn qosa alǵandaǵy memlekettik densaýlyq saqtaý uıymdaryn kadrlyq qamtamasyz etý jónindegi sharalar qabyldaý boıynsha quzyretteri keńeıtilgen. Tutastaı alǵanda, zań jobasy boıynsha memlekettiń, jumys berýshiniń jáne azamattardyń óz densaýlyǵyn saqtaýǵa ortaq jaýapkershiligin damytý sharasy da qamtylyp otyr. Bul rette jumys berýshi tekserip qaralýlardan, sondaı-aq tegin medıtsınalyq kómektiń kepildik berilgen kólemi sheńberinde profılaktıkalyq medıtsınalyq qaraýdan ótpegen adamdardy jumysqa almaýyn kózdeıtin normany qarastyrylǵan. Qoǵamdyq mańyzy bar jumyspen aınalysatyn qyzmetkerler úshin aýysym aldynda mindetti medıtsınalyq tekserýler engizý usynylady. Bul norma kásibı aýrýlardy aıqyndap, onyń aldyn alýǵa, sondaı-aq uıym qyzmekterleriniń eńbek qaýipsizdigin damytýǵa múmkindik bermek. Zań jobasy aldaǵy ýaqytta palatanyń ekinshi oqylym boıynsha qaraýyna shyǵarylmaq.
