Qoǵamdyq qor 865 naýqas balanyń shetelde em alýyna septigin tıgizdi

ASTANA. QazAqparat - Halyqaralyq balalardy qorǵaý kúninde «DOM» qoǵamdyq qory Beıbitshilik jáne kelisim saraıynda múmkindigi shekteýli bala­larǵa arnalǵan «Armandar oryn­dalady» atty erekshe kontsert ótkizdi.

«21 mamyrdaǵy jaǵdaıǵa sáıkes bir ǵana «Balalarǵa ómir syıla» jobasynyń aıasynda biz 865 naýqas bala úshin sheteldik 1220 operatsııa men emdeý kýrstaryn uıymdastyrdyq. Bul kontsertti jasalǵan jumystar boıynsha bizdiń esep berý imiz dep aıtýǵa da bolady. Óıtkeni barlyq kómek kórsetken balalardy nemese olarǵa qol ushyn sozǵan jandardy bir jerge jınaý múmkindigi bola bermeıdi», - dedi QazAqparat tilshisine bergen suhbatynda «DOM» qoǵamdyq qorynyń atqarýshy dırektory Tatıana Semenova.

Onyń aıtýyna qaraǵanda, «Bala­lar­ǵa ómir syıla», «Aýtızmdi jeńýge bolady» jáne «Qazaq­stan jetim ba­la­larsyz» atty jobalarǵa qatys­qan balalardyń ónerleri aıaýshylyq sezimin týdyrmaıdy, kerisinshe maqtanysh sezimin oıatady.

«Aýtıst balalar óz áleminde ómir súredi. Olardyń sahnada óner kórsetýi - tańǵajaıyp jaǵdaı, bul olar úshin, olardyń ata-analary jáne qor úshin úlken jetistik bolyp tabylady», - dep atap ótti ol.

T. Semenovanyń aıtýynsha, qurylǵanyna 2 jyl bolǵan «Qazaqstan jetim balalarsyz» jobasy aıasynda 80 balany asyrap alǵan, al 94 bala qamqorlyqqa, 49 bala patronattyq tárbıege alyndy.

Kontsert bastalmas buryn dalada «Dance Battle» uıymdastyry­la­dy. Onda múmkindigi shek­teý­li jandar deni saý azamat­tar­men teń dáre­jede bıledi.