Qoǵamdyq komıssııa saılaý kezinde kóńil tolarlyqtaı qyzmet atqardy - N.Erimbetov

ASTANA. QazAqparat - Búgin Ortalyq kommýnıkatsııalar qyzmetindegi brıfıngte QR Saılaýdy baqylaý jónindegi respýblıkalyq qoǵamdyq komıssııa tóraǵasy Nurlan Erimbetov saılaý naýqanynda komıssııanyń jumysy týraly aıtyp berdi.

Onyń sózine qaraǵanda, komıssııa saılaýǵa on myńǵa jýyq baıqaýshylardy daıarlap, bul óz kezeginde elimizdiń barlyq saılaý ýchaskelerin qamtýǵa múmkindik berdi. Osy arqyly komıssııa saılaý úderisiniń barysy turǵysynda tolyq aqparatty jınaqtady.

«Daýys berý kúninde bizdiń shtab táýlik boıy jumys istedi. Osy oraıda búginde aryzdar men shaǵymdar joq. Men buny ashyq aıtyp otyrmyn, sebebi biz kóptegen óńirde jumys istep jatqan áriptesterimizge senemiz. Bul múmkindikti paıdalana otyryp, áriptesterime alǵysymdy aıtamyn. Saılaý ótti, endi saıası baǵany elimiz, qoǵam beretin bolady. Degenmen de biz ózimizdiń jumysymyzdy abyroımen atqardyq. Biz úshin bul mańyzdy»,-dedi N. Erimbetov.

Bul rette ol respýblıkalyq komıssııanyń músheleri Qazaqstannyń barlyq óńirlerine baryp, partııalyq uıymdardyń ókilderimen, depýtattyqqa kandıdattarmen jáne halyqaralyq baıqaýshylarmen kezdeskenin eske salyp ótti.

«Meniń oıymsha, búginde eldiń patrıottary bolyp sanalatyn adamdardyń qalyń qatary qalyptasty jáne olar óz isterine óte adal»,-dedi ol.