Qoǵamdyq kóliktiń júrgizýshisi qarsy jolaqqa shyǵyp ketkeni úshin jaýapkershilikke tartyldy
ALMATY. QazAqparat- Qoǵamdyq kóliktiń júrgizýshisi qarsy jolaqqa shyǵyp ketkeni úshin jaýapkershilikke tartyldy, - dep habarlady búgin Almaty q. ІІD baspasóz qyzmetinen.
Ótken aptanyń sońynda ǵalamtor jelisinde 67-shi baǵdarly avtobýs júrgizýshisiniń jol qozǵalysy erejesin óreskel buzǵandyǵy jaıynda túsirilgen beınetaspa paıda boldy.
«Bul beınetaspa muqııat tekserilip bolǵan soń, avtobýs júrgizýshisi 1968 jyly týǵan «K» esimdi azamatqa qatysty ákimshilik yqpal etý sharasy qoldanyldy. Belgili bolǵanyndaı, jol qozǵalysy erejesi ústimizdegi jyldyń 9 qańtarynda saǵat 13:00 shamasynda Jubanov kóshesiniń ońtústik jaǵynda, Momyshuly kóshesiniń boıynda oryn alǵan. Bul qoǵamdyq kólik soltústik baǵytta kele jatqan. Keptelisti aınalyp ótý maqsatynda ol qarsy jolaqqa shyǵyp ketip, avtobýs jolaýshylary men basqa da jol qozǵalysyna qatysýshylardyń ómiri men densaýlyǵyna qaýip tóndirgen. Júrgizýshi jol qozǵalysy erejesin buza otyryp, quqyq buzýshylyq áreketke barǵandyǵyn tolyǵymen moıyndady. Ol QR Ákimshilik quqyq buzýshylyq kodeksiniń 596-shy babynyń 3-shi tarmaǵy boıynsha ákimshilik jaýapkershilikke tartyldy. Ol bir jylǵa deıin kólik júrgizý quqyǵynan aıyryldy», - dedi osyǵan oraı, Almaty q. ІІD Ákimshilik polıtsııa Basqarmasy bastyǵynyń orynbasary, polıtsııa polkovnıgi Jandos Muratálıev.
