Qoǵamdyq kólikterde tegin júrgisi keletin «qoıandardyń» portreti jasaldy
ALMATY. QazAqparat - Almatyda «Ońaı» tólem júıesi engizilgennen beri avtobýs marshrýttarynan kondýktorlar azaıdy. Búginde jol aqysyn tóleý nemese tólemeý jolaýshynyń ar-uıatyna baılanysty.
Erikti tólem júıesi qoǵamdyq dúnıeni tegin paıdalanyp qalǵysy keletin «qoıandar» úshin jaqsy boldy. Keı adamdardyń kartasynda shynymen aqsha bitip qalsa, keı adamdar qaqpaqsyz qalǵan qazannan qarpyp qalyp júr.
Jolaýshylar tasymaly qyzmeti búginde «qoıandardyń» portretin jasap alǵan.
«Greenbus» JShS basshysy Baýyrjan Kýlıshev avtobýstarda tegin júretin adamdardyń qandaı bolatynyn QazAqparat tilshisine sýrettep berdi.
«Kóp jaǵdaıda bul adamdar kontroler avtobýsqa kirip, jolaqysyn kórsetińizder degende baryp qozǵala bastaıdy. Negizinde ereje boıynsha jolaýshylar kirgen boıda jolaqysyn tóleýi tıis. Sondaı-aq, kópshiligi bıletsiz júrgenin moıyndaı qoımaıdy. Olar avtobýsta adam kóp boldy nemese kondýktordy kútpeı uıyqtap qaldyq degen syltaý aıtady», - dedi B.Kýlıshev.
Kásiporyn basshysy «qoıan» jolaýshylardyń kóbinese tańǵy saǵat 07.00 - 09.00 nemese keshki saǵat 17.00 - 19.00 arasynda Qalqaman, Abaı-Baıtursynov, Abaı-Nazarbaev, Abaı-Altynsarın, Tóle bı-Momyshuly, Saıran, Tólebı-Seıfýllın, Saıahat, Tımırıazev-Baızaqov, Súıinbaı kóshelerindegi aıaldamalarda, Soltústik aınalma joly shossesinde jıi kezdesetinin aıtty.
«Kóbinese 17-25 jas aralyǵyndaǵy jastar tegin júrgendi jaqsy kóredi. Olar sonymen qatar, jeke basqa arnalǵan kartalardy da paıdalanady. 1 maýsymnan bastap bıletsiz qoǵamdyq kólikpen júrgen 544jolaýshy ustaldy. Sondaı-aq, 63 jolaýshy bógde bireýdiń ataýly kartasyn paıdalanyp kelgeni anyqtaldy. Onyń ishinde shetel azamattary da bar. Bul kartalardy baqylaý qyzmeti tárkilep alyp, keıin ıesine qaıtarady. Bul jolaýshylardyń barlyǵy ákimshilik jazaǵa tartyldy. Árqaısysyna 2 AEK, ıaǵnı 4810 tg kóleminde aıyppul salyndy», - dedi Baýyrjan Kýlıshev.
Aıta ketsek, qalada «Ońaı» júıesi engizilgennen beri avtobýspen júretin jolaýshylar qarasyn paıdalanýshylar sany kóbeıgen. Kúnine bir baqylaýshy 1300 jolaýshyny teksere alady.
foto:motor.kz
