Qoǵamdyq kólikte jeńildikpen júretin azamattardy fototirkeý ýaqyty sozyldy
ASTANA. QazAqparat - Tamyz aıynyń basynda Astana qalasy boıynsha qoǵamlyq kólikterde jeńildikpen júretin azamattardyń fotosyn túsirip, bir júıege tirkeıtin joba bastalǵan edi.
Jeńildikpen júretin azamattardyń barlyǵyn qamtý úshin joba tamyzdyń sońyna deıin jalǵasyn boldy.
Bul týraly búgin Astanada ótken brıfıng barysynda «Astana LRT» JShS baspasóz hatshysy Aıgúl Jamalova málim etti.
«Astana qalasy ákimdiginiń qoldaýymen qoǵamdyq kólikterde jol júrý aqysyn elektrondy túrge aýystyrý sharalarynyń aıasynda 2015 jyldyń 1 tamyzynan bastap avtobýstarda jeńildikpen júretin azamattardy fototirkeýden ótkize bastaǵan edik. Ózderińiz bilesizder, Otan soǵysynyń ardagerleri, zeınetkerler, otbasynyń asyraýshysynan aıyrylǵandyqtan memlekettik áleýmettik aqy alatyn jandar, kóp balaly otbasynyń balalary, múmkindigi shekteýli azamattar, 16 jasqa tolmaǵan múgedek balalar qalamyzdyń qoǵamdyq kólikterinde arnaıy jeńildikpen, ıaǵnı tegin júredi. Mine, osy azamattar elektrondy bılet engizilgen kezde bir bazadan tabylý úshin fototirkeýden ótýleri kerek. Fototirkeý jobasy aıasynda osy sanattaǵy azamattardyń sýreti bir bazaǵa jınalyp, olarǵa arnaıy jeke jol júrý bıletteri beriledi»,-dep túsindirdi baspasóz hatshy.
Onyń málimetine súıensek, 1 tamyzdan bastap 45 myńǵa jýyq adam fototirkeýden ótken.
«Jalpy, Astana qalasy boıynsha fototirkeýden ótkizetin 25 oryn bar. Atap aıtsaq, fototirkeý jumysy Esil aýdany boıynsha № 24, 45, 66, 69,76 orta mektepterde, Saryarqa aýdany boıynsha № 7, 12, 25, 14, 19, 35, 36, 68, 49, 58 orta mektepterde, Almaty aýdany boıynsha №4, 10, 16, 28, 29, 44, 48, 51, 55, 72 orta mektepterde jalǵasyp jatyr»,-dep tolyqtyrdy A.Jamalova.
