Qoǵamdyq keńesterge syn kóp - Marat Báshimov

ASTANA. QazAqparat – Qoǵamdyq keńesterge syn kóp. Ortalyq kommýnıkatsııalar qyzmetinde ótken brıfıngide Sybaılas jemqorlyqqa qarsy is-qımyl agenttigi qoǵamdyq keńesiniń tóraǵasy Marat Báshimov osylaı málimdedi, dep habarlaıdy QazAqparat tilshisi.

Ótken jyly atqarylǵan jumystardyń qorytyndysyn shyǵarǵan Marat Báshimov qoǵamdyq keńes músheleri zańnamalarǵa sybaılas jemqorlyqtyń taralýyna jol bermeıtin normalardy engizý baǵytynda jumys isteıtinin atap ótti.

«Ótken respýblıkalyq forýmda qoǵam ókilderi kóp jınalyp, Úkimetke óz talap-tilekterin aıtty. Elimizde 232 qoǵamdyq keńes bar. Qoǵam olardy qoldap, qaı baǵytta kele jatqanyn bilip otyrýy tıis. Óıtkeni, qoǵamdyq keńesterge syn kóp. Shyn máninde, qoǵamdyq keńester paıdaly bolýy kerek», - dedi Marat Báshimov.

Ol sybaılas jemqorlyq qylmysy úshin sottalǵandardy shartty túrde merziminen buryn bosatý toqtatylǵanyna nazar aýdardy. Sonymen qatar, zańnamaǵa «zańsyz baıý» uǵymy engizilgenin aıtty. Oǵan saı, endi laýazymdy tulǵalardyń naqty tabysynan asyp túsetin kiristerin tergeý múmkindigi berildi.