Qoǵamdyq keńesterdiń jumysyna naqty qandaı ózgerister engizildi
NUR-SULTAN. QazAqparat – Aqparat jáne qoǵamdyq damý vıtse-mınıstri Bolat Tilepov qoǵamdyq keńes jónindegi zańǵa naqty qandaı ózgerister men tolyqtyrýlar engizilgenin aıtyp berdi, dep habarlaıdy QazAqparat tilshisi.
«2021 jylǵy 3 qańtarda Memleket basshysy «QR keıbir zańnamalyq aktilerine qoǵamdyq keńesterdiń qyzmeti máseleleri jóninde ózgerister men tolyqtyrýlar engizý týraly» zańǵa qol qoıdy. Jalpy qoldanystaǵy qoǵamdyq keńester týraly zańnyń ózi 2015 jyly qabyldanǵan bolatyn. Ýaqyt kórsetkendeı, bul qujat ta, jalpy qoǵamdyq keńester ınstıtýty óz ózin aqtady desek te bolady», - dedi Bolat Tilepov OKQ-da ótken baspasóz máslıhatynda.
Vıtse-mınıstrdiń aıtýynsha, atalmyz zańdy usynylyp otyrǵan ózgertýler tek olardyń qyzmetin odan ary jetildirýdi kózdep otyr.
«Atap aıta keterligi, qoldanystaǵy zańǵa uzyn sany 40 jańa norma men túzetilgen 28 norma engizilip otyr. Sondyqtan birden eń mańyzdy máselelerge toqtalaıyn. Birinshiden, qoǵamdyq keńesterdiń quramyn jasaqtaýda basty talap – derbes jáne táýelsiz qyzmet etý. Sol sebepti jumys tobynyń basshysyn azamattyq qoǵam ókilderi qatarynan saılaý usynyldy. Bul usynysty biz keńester quramyn irikteý isinde ákimshilik resýrstardyń yqpalyn azaıtý maqsatynda qabyldadyq. Jańa zańnama kandıdattar esebinen rezervtik tizim jasaýǵa jáne keńes quramynan shyqqandardyń ornyna osy tizimnen jańa múshelerdi saılaýǵa múmkindik beredi», - dedi ol.
Bolat Tilepov keńester quramyn ýaqtyly tolyqtyryp otyrýǵa qatysty syn buǵan deıin kóp aıtylyp kelgenin aıtyp ótti.
Sondyqtan jańa norma bul máseleni tıimdi jolmen retteýge baǵyttalǵan.
«Qoldanystaǵy zańda qoǵamdyq keńes músheleriniń sanynyń naqty mólsheri qarastyrylmaǵan bolatyn. Bul rette keńes músheleriniń sany ortalyq deńgeıde 15-30 adam aralyǵynda, al jergilikti deńgeıde halyq sanyna baılanysty anyqtaý usynylyp otyr. Basty talap – keńes quramyna túrli áleýmettik toptardyń ókilderin tartý qajet. Osyǵan oraı ókiletti organ keńestiń sany men sapalyq quramy boıynsha usynym ázirleıdi. Sonymen birge zań qoǵamdyq keńes jumysyna qatyspaıtyn keńes músheleriniń ókilettigin toqtatý tártibin retteıtin normalarmen tolyqtyrylyp otyr», - dedi ol.
