Qoǵamdyq keńesterdiń qyzmetin uıymdastyrý máslıhattarǵa júkteledi
Atalǵan zań jobasy boıynsha negizgi baıandama jasaǵan QR Aqparat jəne qoǵamdyq damý mınıstri Aıda Balaevanyń aıtýynsha, jalpy qoǵamdyq keńester týraly zańnyń ózi Elbasynyń tapsyrmasymen 2015 jyly qabyldanyp, qoldanysqa engizilgen.
«Ýaqyt kórsetkendeı, qujat ta, qoǵamdyq keńester ınstıtýty da ózin ózi aqtady. Búgingi usynylyp otyrǵan túzetýler tek olardyń qyzmetin odan ary jetildirýdi kózdeıdi. Qoldanystaǵy zańǵa 40 jańa norma jáne 28 ózgeris engizý usynylady. Birinshi - qoǵamdyq keńesterdiń quramyn jasaqtaý. Bul jerdegi basty talap - derbes jáne táýelsiz qyzmet etý. Sondyqtan jumys tobynyń basshysyn azamattyq qoǵam ókilderi qatarynan taǵaıyndaý usynalady. Zań jobasy kandıdattar esebinen rezervtik tizim jasaý, keńes quramynan shyqqandardyń ornyna rezervtik tizimnen jańa músheler saılaý úshin qosymsha konkýrs jarııalaýǵa múmkindik beredi. Keńester quramyn ýaqytyly tolyqtyryp otyrý máselesi buǵan deıin kóp aıtylatyn. Bizdiń oıymyzsha, jańa norma bul máseleni tıimdi jolmen retteıtin bolady», - dedi mınıstr.
Onyń aıtýynsha, ekinshiden qoǵamdyq keńesterdiń ókilettigin kóterý kózdeledi. Zań jobasy qoǵamdyq keńesterge ótinishter men normatıvtik-quqyqtyq aktiler jobasyn olardyń qoǵamdyq mańyzdylyǵyna qaraı ózderi iriktep qaraýǵa quqyq beredi. Sondaı-aq qoǵamdyq keńesterge jergilikti deńgeıdegi quqyq qorǵaý organdary basshylarynyń esebin tyńdaýǵa ókilettik beretin norma engiziledi.
«Taǵy bir toqtala ketetin mańyzdy ózgeris - Memleket basshysynyń tapsyrmasy boıynsha memlekettik jáne kvazımemlekettik sektordyń satyp alý konkýrstyq komıssııalaryna qoǵamdyq keńes múshelerin qatystyrýǵa ókilettik beretin tolyqtyrý bar. Úshinshi - qoǵamdyq baqylaýdy júrgizý protsedýrasyn retteý. Bul buryn zańmen aıqyndalǵan qoǵamdyq baqylaýdyń barlyq 4 formasyn qamtıdy. Atap aıtqanda, qoǵamdyq talqylaýlar, qoǵamdyq saraptama, qoǵamdyq monıtorıng jáne memlekettik organ jetekshileriniń esebi. Ol úshin ókiletti organ osy rásimdi uıymdastyrý jáne ótkizý erejelerin ázirleıdi», - dedi ol.
Mınıstr tórtinshiden qoǵamdyq keńesterdyń qyzmetin uıymdastyrý qamtamasyz etiletindigin aıtady. ıAǵnı, budan bylaı jergilikti deńgeılerde uıymdastyrý jumystary máslıhattarǵa júkteledi.
«Ózderińizge málim, bul mindet buǵan deıin jergilikti ákimdikterde bolatyn. Alaıda qoǵamdyq keńesterdiń bastamasy boıynsha jáne depýtattardyń qoldaýynan keıin zań jobasyna tıisti ózgertýler engizildi. Besinshi - qoǵamdyq keńester salasynda ókiletti organdy anyqtaý. Bul oraıda ókiletti organ retinde Aqparat jáne qoǵamdyq damý mınıstrligi usynylady. Onyń basty mindeti - keńester qyzmetin úılestirý jáne ádistemelik kómek berý. Sondaı-aq Memleket basshysyna qoǵamdyq keńester qyzmeti týraly jyl saıyn ulttyq baıandama jasalady. Altynshy - kvazımemlekettik sektorda qoǵamdyq keńester qurý. Memleket basshysynyń Joldaýynda berilgen tapsyrmalar negizinde kvazımemlekettik sektorda, atap aıtqanda ulttyq kompanııalarda, últtyq holdıngterde, ulttyq basqarý holdıngterinde qoǵamdyq keńester qurý jónindegi tolyqtyrýlar engizildi», - dedi Aıda Balaeva.
