Qoǵamdyq keńester túrli máseleler boıynsha pikir bildirý alańyna aınaldy
ASTANA. QazAqparat – Elimizde qoǵamdyq keńesterdi qurý úrdisinde oń nátıjeler bar. Bul týraly QR Aqparat jáne qoǵamdyq damý mınıstrligi Azamattyq qoǵam isteri komıteti tóraǵasynyń orynbasary Gúlbara Sultanova aıtty, dep habarlaıdy QazAqparat tilshisi.
«Jalpy, qazirgi kezde qoǵamdyq keńester ınstıtýty túrli máseleler boıynsha azamattyq qoǵamnyń pikirin bildirý alańyna aınaldy jáne memlekettik organdar qyzmetiniń ashyqtyǵy men jarııalyǵyn qamtamasyz etedi. Qoǵamdyq keńesterdiń jurtshylyq arasyndaǵy ımıdji, tanymaldylyǵy, belsendiligi kún saıyn artyp keledi. Keńesterdiń elimizdiń qoǵamdyq-saıası ómirinde alatyn orny erekshe ekenin atap ótken jón», - dedi G. Sultanova qoǵamdyq baqylaý máselelerin talqylaýǵa arnalǵan sarapshylar kezdesýinde.
Onyń aıtýynsha, qoǵamdyq keńesterdi engizý «esep beretin memleketti qalyptastyrý» protsesine oń áser tıgizdi jáne belsendi azamattarǵa eldiń qoǵamdyq ómirine qatysýyna múmkindik berdi. Qazir 4 myńnan astam ókili bar 256 qoǵamdyq keńestiń arasynda 86 paıyzy azamattyq qoǵam ókili. Sonyń ishinde úkimettik emes uıymdar, BAQ ókilderi, saıası partııalar men kásipodaqtardyń músheleri bar.
«Elimizde qoǵamdyq keńester qyzmetine erekshe nazar aýdarylyp otyr. Joldaýda qoǵamdyq keńesterdiń qyzmetine qatysty máseleler eskerilgen. Jalpy, Memleket basshysynyń Joldaýynda ekonomıkalyq jáne saıası jańǵyrtýǵa qatysty birqatar mindet júkteldi», - dedi vedomstvo ókili.
Onyń sózine qaraǵanda, bıyl qoǵamdyq keńesterdi qurý protsesine azamattardyń belsendi qatysýynyń oń úrdisi baıqalyp otyr.
«Osy oraıda tıisti ótinimder men shaǵymdar kelip túsip jatyr. Jergilikti ókildik organdardyń qoǵamdyq keńesterdi qurý kezinde ákimshilik resýrstardy paıdalanýy derekteri kezdesip jatady. Sonymen qatar, azamattyq qoǵam ókilderiniń memlekettik organdardyń aıtqanyna kóne salýy jaǵdaılary da bolady. Sondyqtan bul máselelerdi sheshý úshin jyl saıyn keńesterge kásibı mamandar, sarapshylar tartylyp jatqanyn kórýge bolady. Atalǵan ınstıtýttyń deńgeıi de ósip keledi», - dedi Gúlbara Sultanova.
