Qoǵamdyq keńester týraly múldem estimegen óńirler bar – zertteý
NUR-SULTAN. QazAqparat - 2021 jyly Aqparat jáne qoǵamdyq damý mınıstrliginiń tapsyrysymen júrgizilgen zertteýde Qazaqstan halqyn memlekettik josparlaýǵa jumyldyrý deńgeıi anyqtaldy, dep habarlaıdy QazAqparat finprom.kz saıtyna silteme jasap.
Anyqtalǵandaı, saýalnamaǵa qatysqandardyń 69% (barlyǵy 1200 respondent) qoǵamdyq keńester týraly eshteńe bilmeıdi. Tek 3 óńirde halyqtyń qoǵamdyq keńester týraly habardar bolýy qanaǵattanarlyq dárejede.
Qoǵamdyq keńester týraly múldem beıhabar óńirler tiziminde Qaraǵandy oblysy kósh bastap tur. Onda saýalnamaǵa qatysqandardyń 82% qoǵamdyq keńester týraly estimegen. Odan keıin Atyraý jáne Qostanaı oblystary – respondentterdiń 79,5% jáne 76,2% «Qoǵamdyq keńester qyzmeti týraly eshteńe bilmeımin» dep jaýap bergen.
Al Nur-Sultan jáne Almaty qalalarynda saýalnamaǵa qatysqandardyń jartysynan azy ǵana qoǵamdyq keńes týraly habardar bolyp shyqty.
