Qoǵamdyq keńester bes jylda 2 myńnan astam normatıvtik qujatty keri qaıtarǵan

NUR-SULTAN. QazAqparat – QR Aqparat jáne qoǵamdyq damý vıtse-mınıstri Bolat Tilepov ortalyq kommýnıkatsııalar qyzmetinde qoǵamdyq keńesterdiń búgingi jaı-kúıi týraly málimet usyndy, dep habarlaıdy QazAqparat tilshisi.

«Ózderińiz bilesizder, qoǵamdyq keńes ınstıtýty 5 ınstıtýtsıonaldyq reforma sheńberinde 2015 jyly engizilgen bolatyn. Osy ýaqyt tájirıbesi kórsetkendeı, olar qoǵam men bıliktiń arasyn jalǵaýshy retinde óziniń tıimdiligin, jalpy qoǵam ómirine qajettiligin aqtaı bildi. Mysaly, osy 5 jylda qoǵamdyq keńes tarapynan 20 myńnan astam normatıvtik qujat ótken bolsa, sonyń árbir onynshysy nemese 2 myńnan astam qujat keńesten ótpeı, jetildirý úshin keıin qaıtarylǵan. ıAǵnı, azamattardyń ómirine tikeleı áser etetin bul sapasyz qujattardiń kemshiligi der kezinde anyqtalǵan dep aıtýǵa bolady», - dedi vıtse-mınıstr.

Sondaı-aq, ol qazir memlekettik organ basshylary qoǵamdyq keńester aldynda esep bere bastaǵanyn eske saldy.

«Taǵy bir mysal, jyl saıyn 1,5 myń memlekettik laýazym ıesi qoǵamdyq keńes aldynda esep beredi. Bul degenińiz – qosymsha týyndaǵan máseleler men sheshimin tappaı júrgen suraqtarǵa jaýap alý múmkindigi. Osy 5 jylda memlekettik qyzmettiń sapasyna qoǵamdyq monıtorıng aıasynda myńnan astam zertteý jasalyp, barshaǵa ortaq óte ózekti suraqtardy ashyq talqylaý nátıjesinde uzyn sany 2 myńnan astam másele kóterildi. Mine, osynyń bári - kópshiliktiń ortaq máselesine kóz jumbaı, qashan da minberden usynysyn jetkize biletin bizdiń belsendi azamattarymyzdyń aqysyz negizde atqarǵan úlken eńbeginiń jemisi, jalpy azamattyq qoǵamnyń jeńisi. Sondyqtan da, Prezıdenttiń bastamasymen «Qoǵamdyq keńes týraly» zańǵa tıisti ózgerister men tolyqtyrýlar engizilip, osy jyldyń basynan bastap qoldanysqa endi», - dedi vedomstvo ókili.