Qoǵamdyq keńester ataýynan «janyndaǵy» sózin alyp tastaý kerek – Nurlan Ábdirov

NUR-SULTAN. QazAqparat – Qoǵamdyq keńester ataýynan «janyndaǵy» qosymsha sózdi alyp tastaý kerek. Bul týraly búgin «Nur Otan» partııasy janyndaǵy Quqyqtyq keńes tóraǵasy Nurlan Ábdirov aıtty, dep habarlaıdy QazAqparat tilshisi.

«Qoǵamdyq keńester «janyndaǵy» bolmaýy tıis. Búginda aýmaqtyq barlyq qoǵamdyq keńester durys atalady. Olar - oblystyń, aýdannyń, Almaty, Nur-Sultan qalasynyń qoǵamdyq keńesteri», - dedi Nurlan Ábdirov atalǵan keńestiń keńeıtilgen otyrysynda.

Osy rette ol durys atamaýdyń úlgisi retinde Densaýlyq saqtaý mınıstrliginiń qoǵamdyq keńesin mysalǵa keltirdi.

«Eger qoǵamdyq keńes ataýynda Densaýlyq saqtaý mınıstrligi kórsetilse, onda bul durys emes. Ol mınıstrliktiń qoǵamdyq keńesi bola almaıdy. Atalǵan zań jobasymen jumys istegen bastapqy kezeńde-aq biz qoǵamdyq keńester qandaı da bir memlekettik organnyń janyndaǵy, ákimdiktiń, mınıstrliktiń janyndaǵy bolmaýy tıistigimen kúresken edik. Ol aýmaqtyń qoǵamdyq keńesi nemese qandaı da bir baǵyttyń qoǵamdyq keńesi bolýy tıis. Aıtalyq, Іshki ister mınıstrliginde ІІM janyndaǵy qoǵamdyq keńes emes, ishki ister organdarynyń qyzmet máseleleri jónindegi qoǵamdyq keńes bolýy qajet», - dedi N.Ábdirov.

Aıta keteıik, sharaǵa qoǵamdyq keńesterdiń, sarapshylyq qoǵamdastyqtardyń, ÚEU-lerdiń músheleri, memlekettik organdar men halyqaralyq uıymdardyń basshylary qatysty.

Búginde elimizde túrli deńgeıdegi 234 qoǵamdyq keńes jumys isteıdi.