Qoǵamdyq keńes músheleriniń shyǵyndary bıýdjetten ótelýi múmkin
ASTANA. QazAqparat - Qazirgi zańnamǵa sáıkes, ortalyq jáne jergilikti memlekettik organdar janyndaǵy qoǵamdyq keńes músheleriniń jalaqysy tólenbeıdi, olardyń qarjylyq shyǵyndaryn da óteýge ruqsat joq, dep habarlaıdy QazAqparat tilshisi.
«Bul jerde qoǵamdyq keńes músheleriniń jalaqysyn tóleý bastamasy kóterilip otyrǵan joq. Ol uıymdastyrý-tehnıkalyq sharalarǵa, ıaǵnı keńse zattary, ınternet, baılanys, kólik jáne taǵy sol sııaqty shyǵyndarǵa baılanysty. Máselen, oblystyń qoǵamdyq keńesi belgili bir aýdanda kóshpeli otyrys ótkizetin bolsa, onda ol jerge keńes músheleri barýy kerek qoı. Demek, jolǵa shyǵyn shyǵarý qajet. Mine, osyǵan baılanysty qoǵamdyq keńes músheleriniń shyǵyndardy óteý boıynsha usynys bar. Sosyn qoǵamdyq keńeske azamattardy qabyldaý úshin qandaı da bir úı-jaı kerek qoı. Bálkim, kabınet bolady. Sebebi halyq qoǵamdyq keńes otyratyn naqty bir jerge baryp, aryz-shaǵymdaryn aıtýy tıis», - dedi QR Din isteri jáne azamattyq qoǵam mınıstrliginiń qoǵamdyq keńestermen jumys jónindegi basqarma basshysy Gúlbaram Sultanova jýrnalısterge bergen suhbatynda.
Onyń aıtýynsha, qazirgi zańnamada qoǵamdyq keńesterdiń naqty spetsıfıkasy jazylmaǵan. Sol sebepti qarjylyq shyǵyndar da qarastyrylmaıdy. «Búginde biz osy máseleni zerdelep jatyrmyz. Qarjy mınıstrligi bıýdjet zańnamasyna ózgerister men tolyqtyrýlardy daıyndap jatyr. Onymen birge qoǵamdyq keńesterdiń shyǵyndaryn óteý máselesi de eskerilse, jaqsy bolar edi», - dep atap kórsetti mınıstrliktiń ókili.
Aıta keteıik, elimizde qoǵamdyq keńester týraly zańnamanyń qabyldanǵanyna bir jyl boldy. Osy ýaqyttyń ishinde ortalyq jáne jergilikti memlekettik organdardyń janynan 200-den astam qoǵamdyq keńes ashyldy. Atalǵan keńester ákimder men mınıstrlerdiń esepterin tyńdap, san alýan máselelerdi sheshýge atsalysady.
