Qoǵamdyq keńes múshelerin saılaý júıesine ózgerister engiziledi
ASTANA. QazAqparat - Qazirgi kezde ortalyq jáne jergilikti memlekettik organdar janyndaǵy qoǵamdyq keńes múshelerin saılaý júıesiniń mashaqaty kóp. Sol sebepti ony barynsha jeńildetý kózdelgen, dep habarlaıdy QazAqparat tilshisi.
QR Din isteri jáne azamattyq qoǵam mınıstrliginiń qoǵamdyq keńestermen jumys jónindegi basqarma basshysy Gúlbaram Sultanovanyń aıtýynsha, qoldanystaǵy zańnama boıynsha qoǵamdyq keńestiń bir múshesi shyǵyp ketse, aldymen konkýrs jarııalanady. Odan keıin jumys toby qurylady.
«Ondaı jumys kóp ýaqyt alady. Mashaqaty kóp. Qoǵamdyq keńestiń bir múshesi belgili bir sebepterge baılanysty quramnan shyǵyp ketse, jumys tobyna konkýrs jarııalaý qajet. Sosyn jumys toby on kún ótinimdi kútedi. Odan keıin qoǵamdyq keńeske taǵy konkýrs jarııalanady. Bir adam úshin konkýrs ótkizýdiń qajet joq dep oılaımyz. Keńes quramy bar ma, bar. Olar ózderi múshelikke adam qabyldaýy tıis», - deıdi Sultanova.
Onyń aıtýynsha, atalǵan bastamaǵa baılanysty tıisti qujattar jarııalandy. Aldaǵy bir-eki aıdyń ishinde naqty sheshim shyǵýy qajet.
Aıta keteıik, búginde ortalyq jáne jergilikti memlekettik organdar janyndaǵy qoǵamdyq keńes músheleriniń qarjylaı shyǵyndaryn óteý máselesi de zerdelenip jatyr.
