Qoǵamdyq keńes músheleri almatylyqtardy vaktsına alýǵa shaqyrdy
Ótken táýlikte Almatyda 1 403 adamnan koronavırýs anyqtaldy. Juqpaly aýrýlar aýrýhanalarynda 6 074 adam jatyr. Onyń 188-i bala. Jansaqtaý bóliminde 434 naýqas bar.
Megapolıste epıdemıologııalyq ahýal kúrdeli. Osyǵan baılanysty, Qoǵamdyq keńes músheleri almatylyqtardy vaktsına salýǵa shaqyrdy.
Almaty qalasy Qoǵamdyq keńesiniń tóraǵasy, Qazaqstan Respýblıkasy joǵary oqý oryndary qaýymdastyǵynyń prezıdenti, Turan ýnıversıtetiniń rektory Rahman Alshanov bilim berý júıesi úshin ujymdyq ımmýnıtetti qalyptastyrýdyń jáne sapaly bilim berýdiń mańyzdylyǵyna toqtaldy.
«Pandemııa – qaýipti jáne odan qurban bolǵandar da bar. Antıvakserler qaıǵyly oqıǵalar oryn alǵan otbasylarǵa qarap, qateleskenderine kóz jetkizsin. Meniń oıymsha, búginde vaktsınalanýdan basqa tıimdi ádis joq. Oqýdy aıaqtaý úshin biz barlyq stýdentterdi vaktsınalanýǵa shaqyramyz. Ekpe ortalyqtary barlyq joǵary oqý oryndarynda ashyq, olar stýdentterdi qabyldaýǵa daıyn», - dedi Rahman Alshanov.
Almaty qalasy Qoǵamdyq keńesiniń múshesi Gúlfaırýz Qasymova da, koronavırýstan tek vaktsına qorǵaıtynyn aıtty.
«Bizdiń qalada, jalpy respýblıkada ujymdyq ımmýnıtetti qalyptastyrýǵa jáne qalypty ómirge oralýǵa barlyq jaǵdaı jasalǵan. Dál osy vaktsına ǵana bizdiń eldi indetten qutqarady», - dedi Gúlfaırýz Qasymova.
Aıda Áljanovanyń aıtýynsha, megapolıste ólim kóp tirkelip jatyr.
«Bizde sońǵy kúnderi ólim-jitim kóbeıip ketti. Óıtkeni Almatyda halyq kóp. Vırýs iri megapolısterde óte tez taralady. Odan shyǵýdyń jalǵyz joly – vaktsınalaný», - dedi Aıda Áljanova.
«El halqynyń pandemııadan ujymdyq qaýipsizdigin qamtamasyz etý úshin halyqtyń kem degende 75%-y vaktsınalaný qajet. Qazaqstanda vaktsına jetkilikti ári tegin», - deıdi tehnıka ǵylymdarynyń doktory Borıs Japparov.
Onyń pikirinshe, búginde jurtshylyq Úkimetiń óz azamattaryna jasap jatqan múmkindikterin múlde elemeýde.
«Kez kelgen qoǵamda bolǵan jáne bola beretin nadan adamdardyń pikirin tyńdaýdyń qajeti joq. Barlyq qazaqstandyqtar azamattyq sanany kórsetip, vaktsınatsııaǵa barýy kerek», - dedi Borıs Japparov.
