Qoǵamdyq keńes quramyn bekitý quqyǵy jergilikti ókiletti organdarǵa berilmek

NUR-SULTAN. QazAqparat – QR Aqparat jáne qoǵamdyq damý vıtse-mınıstri Danııar Esın «Qoǵamdyq keńester qyzmetiniń máseleleri boıynsha QR-nyń keıbir zańnamalyq aktilerine ózgertýler men tolyqtyrýlar engizý týraly» zań jobasynyń negizgi erejelerin tanystyrdy, dep habarlaıdy QazAqparat tilshisi.

«Qoǵamdyq keńester konsýltatıvtik-keńesshi organ sanalatyndyǵyn jáne óz qyzmetin táýelsiz ustanym negizinde júzege asyratyndyǵyn nazarǵa ala otyryp, qoǵamdyq keńesterdi quramyn qurý jergilikti ókiletti atqarýshy organdarǵa, al qoǵamdyq keńesterdiń quramyn bekitý jergilikti organdarǵa berý usynyldy», - dedi dedi vıtse-mınıstr «Nur Otan» partııasy janyndaǵy Quqyqtyq keńestiń keńeıtilgen otyrysynda.

Onyń atap ótýinshe, zań jobasyna sáıkes, máslıhat ákimdik usynǵan qatysýshylar quramyn qabyldaýǵa nemese qabyldamaýǵa quqyǵy bar.

«Zań jobasynda keńester qyzmetiniń keıbir aspektilerin qarjylandyrý týraly sheshim de usynylady. Qoǵamdyq keńes músheleri qoǵamdyq bastamamen qyzmet atqarady. Qoǵamdyq keńes qyzmetine tólem jasaý máselesi sheshilgen. Buǵan qosa, qazirgi ýaqytta qoldanystaǵy laýazymdar tizilimine qoǵamdyq keńes hatshysy laýazymyn engizý jumysy júrgizilip jatyr. Sondaı-aq keńse taýarlaryn satyp alýǵa, jergilikti deńgeıde qoǵamdyq baqylaý júrgizý úshin kásibı sarapshylar qyzmetine tólem jasaýǵa jáne óńir ishindegi is-saparlar shyǵyndaryna qarajat qarastyrylǵan», - dedi Danııar Esın.