Qoǵamdyq keńes bazarǵa aınalǵan vokzaldy synǵa aldy
ALMATY. Qazaqparat - Almatyda qoǵamdyq keńes músheleri avto jáne temirjol vokzaldarynyń jumystaryn tekserdi, dep habarlaıdy Qazaqparat tilshisi.
Byltyr baqylaý toby áýejaıdyń jumysynan shıkilik tapqan bolatyn. Bıyl «Saıran» jáne «Saıahat», «Almaty-1» jáne «Almaty-2» vokzaldary tekserildi.
«Monıtorıng toby vokzaldardan antısanıtarııa, zań buzýshylyq derekterin anyqtady. Qosymsha esikter jabyq, órt sóndirý ballondary eski. Vokzaldar jolaýshy tasymalymen ǵana aınalysýy tıis. Ol jerdi jabaıy saýda alańyna aınaldyrýǵa bolmaıdy», - dedi keńes múshesi Nurlan Jazylbekov.
Onyń ústine qaladaǵy atalǵan nysandardyń barlyǵynda múgedekterdiń júrip-turýyna tıisti jaǵdaı qarastyrylmaǵan.
Mamandardyń aıtýynsha, «Saıran» vokzalynyń ǵımaraty 1983 jyly salynǵan. Monıtorıng toby ǵımaratqa jóndeý qajettigin eskertti.
Sondaı-aq, Qoǵamdyq keńes músheleri «Saıahat» avtovokzalynyń orny nelikten jaıma bazarǵa aınalyp ketkenine tań qalysty. Óz kezeginde «Saıahat» vokzalynyń ıesi Ahmet Aleroev Jetisý aýdanyna kóshetin bolǵan soń qurylys bastamaı otyrǵandyǵyn alǵa tartty.
Aıta ketsek, tekserý kezinde anyqtalǵan máseleler ákimdikke jetkizilmek.
