Qoǵamdyq kelisim bolsa ǵana ál-aýqat artady - Berdibek Saparbaev

Vıtse-premer «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda el Prezıdentiniń alǵa qoıǵan mindetterin iske asyrý jónindegi sharalar týraly aıtyp berdi.

Kezdesýge, sondaı-aq, densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Eńbek jáne halyqty áleýmettik qorǵaý mınıstri Birjan Nurymbetov qatysty.

«Qoǵamdyq kelisim bolǵan kezde oń nátıje de, ál-aýqat ta, gúldený de bolady. Prezıdent Qasym-Jomart Toqaev bul máselege úlken nazar aýdarady. Bul memleket pen qoǵamnyń arasyndaǵy dıalogqa qatysty. Munda úkimettik emes uıymdardyń áleýetin tartý kerek», - dedi Berdibek Saparbaev.

Onyń aıtýynsha, el Úkimeti eki tujyrymdamany ázirleýde: «tyńdaýshy memleket» jáne azamattyq qoǵamdy damytýdyń 2025 jylǵa deıingi tujyrymdamasy. Olar aǵymdaǵy jyldyń sońyna deıin daıyn bolýy tıis.

«Bul qujattarda Ashyq úkimet jáne halyqpen tıimdi keri baılanys máseleleri qozǵalady. Azamattardyń birde-bir ótinishi, birde-bir shaǵymy jaýapsyz qalmaýy kerek», - dep atap ótti Berdibek Saparbaev.

Vıtse-premer qoǵamdyq keńesterdiń qyzmetin kúsheıtý qajettigin atap ótti. «Formalızmdi boldyrmaý úshin olardyń jumysyn jaqsartý kerek» dep esepteıdi ol.

Berdibek Saparbaev óz sózinde bilim berý, densaýlyq saqtaý, áleýmettik qorǵaý jáne t. b. salalarǵa qatysty máselelerdi qozǵady.

Ataýly áleýmettik kómek týraly aıta kele, ol memlekettik qoldaý masyldyq týǵyzbaýy tıis ekenin atap ótti.

Sonymen qatar, daryndy balalardy qoldaý kartasy, balalar múddesin qorǵaıtyn 2030 jylǵa deıingi QR memlekettik saıasatynyń tujyrymdamasy ázirlenetin bolady.

2019 jyldyń sońyna deıin jınaqtardyń kiristiligin arttyrý maqsatynda zeınetaqy aktıvterin ınvestıtsııalaý tásilderin qaıta qaraý josparlanyp otyr.

Kezdesýge qatysýshylar vıtse-premerge óz suraqtaryn qoıyp, olarǵa jaýap aldy. Barlyq eskertýler men ótinishter nazardan tys qalmaıdy, dep sendirdi jurtshylyqty jınalysqa qatysýshylar.