«Qoǵamdyq qatynastyń aınasy - til tutastyǵy» - respýblıkalyq basylymdarǵa sholý
ASTANA. Qyrkúıektiń 17-si. QazAqparat - Qazaq aqparat agenttigi respýblıkalyq basylymdarda qyrkúıektiń 17-si, beısenbi kúni shyqqan ózekti materıaldarǵa sholýdy usynady.
***
«Álemniń 43 eliniń korrýptsııamen kúres júrgizetin mekeme basshylary men osy saladaǵy 20-ǵa jýyq halyqaralyq uıymdardyń ókilderi qazirgideı qıyn jaǵdaıda sybaılas jemqorlyqqa qarsy joıqyn soqqy berý jaıynda ózara aqyl qosyp, alqa qurý úshin Qazaqstanǵa jıyldy. Olardyń jıynyna Elbasy qatysyp, sóz sóıledi. Memleket basshysy jemqorlyqqa qarsy turý hám toıtarys berý «Qazaqstannyń memlekettik saıasatynyń basymdyǵy» dep málimdedi», deıdi «Aıqyn» gazeti «Jemqorlyqqa qarsy turý - Qazaqstannyń memlekettik saıasatynyń basymdyǵy» atty maqalasynda.
Osy basylymda kórnekti memleket qaıratkeri Marat Ospanovtyń saıası kelbetine, saıasatkerligine taldaý jasalǵan maqala jaryq kórdi. «Saıasatker» degen taqyryppen jarııalanǵan maqalanyń avtory - saıası ǵylymdar doktory Náýbát Qalıev.
«Reseı kimge kúsh kórsetpek?» Osy taqyryppen «Aıqyn» gazetinde basylǵan maqalada qyrkúıektiń 9-ynda Reseı Memlekettik dýmasynyń «Qorǵanys jónindegi» zańǵa birqatar ózgerister men túzetýler engizgenin, osy ózgeristen keıin irgeles kórshimizdiń óz qarýly jasaqtaryna shekaradan tys shetelderde áskerı qımyl jasaýǵa ruqsat bergenin jazady. «Bul zańdy qabyldaý arqyly Máskeý neni meńzedi, zań astarynda ne bar? Máskeý ózine qyryn qaraǵan eldiń jurtyna at oınatyp, shoqpar silteýge nege asyqty? Sondaǵy jaýy kim? Shyndyǵynda, Máskeýdiń ózgege aıbat shegetindeı qaýqary bar ma?», deı kelip, osy saýaldarǵa jaýap izdegen.
***
Halqymyzdyń kórnekti qalamgeri, QR Memlekettik syılyǵynyń laýreaty, fılologııa ǵylymynyń doktory, professor Aqseleý Seıdimbek keshe dúnıeden ozdy. Osyǵan oraı Astana qalasynyń ákimi, aqyn-jazýshylar, ǵalymdar, óner qaıratkerleri «Astana aqshamy» gazeti arqyly kórnekti qalamgermen baquldasty.
Osy basylymnyń «Áleýmet saýaly - ákim jaýaby» aıdarynda elorda turǵyndary kókeılerin mazalaǵan saýaldarǵa qala ákiminen jaýap alǵan.
«Astana aqshamy» gazetinde jazýshy-dramatýrg Sultanáli Balǵabaıdyń kólemdi suhbaty «Qoǵamdyq qatynastyń aınasy - til tutastyǵy» degen taqyryppen jaryq kórdi. «Bıik minberlerden anda-sanda «Qazaq bolaıyq!», «Qazaq tiliniń mereıin ósireıik!» dep aıǵaılap qoıyp, bala-shaǵalarymyzdy burynǵydaı orys mektepterine toǵyta bersek, qaıtip qazaq bolmaqpyz. Sózimiz bólek, isimiz odan da bólek. Bul endi sypaıylap aıtqanda - ekijúzdilik», deıdi qalamger. Ekeýara áńgimeni tolyǵymen basylymnyń aıqara betinen oqı alasyzdar.
***
«Qazaqta qala bolǵan Bozoq degen...» Osy taqyryppen «Nur Astana» gazetinde jarııalanǵan maqalada «Astananyń myńjyldyq tarıhy bar. Jasaryp, jaınaǵan elorda jylnamasyn áriden, IX ǵasyrdan bastaý týraly ǵalymdar tujyrymyna Bozoq qalashyǵy negiz bolýda», delingen.
«Nur Astana» basylymynda shahmattan jasóspirimder arasyndaǵy Álem chempıonatynyń kúmis júldegeri Dınara Túıtebaevamen aradaǵy suhbat «Shahmattaǵy karera qarjyǵa tireledi» degen taqyryppen berilgen.
***
«Soltústik - Ońtústik Qazaqstan» elektr qýatyn taratý júıesiniń alyp jobasy aıaqtaldy», dep jazady «Kazahstanskaıa pravda» gazeti.
Basylymnyń jazýyna qaraǵanda, búgin Memleket basshysynyń qatysýymen «Soltústik - Ońtústik Qazaqstan» ekinshi tranzıtiniń iske qosylý saltanaty ótedi. Elektr jelileriniń ulttyq operatory atalǵan jobany merziminen buryn aıaqtap otyr.
«Qazaqstan Prezıdenti jemqorlyqty joıý úshin tórt basty shartty atady», dep jazady «Lıter» gazeti. Keshe Elbasynyń qatysýymen Táýelsizdik saraıynda ótken sharaǵa qatysty «Kazahstanskaıa pravda», «Ekspress-K», «Izvestııa-Kazahstan» gazetteriniń beısenbilik nómirlerinde de jan-jaqty maǵlumattar berilgen.
