Qoǵamdyq qabyldaýda 100-den astam turǵynnyń shaǵymy tyńdaldy - Túrkistan
7 aqpanda Shymkent qalasyndaǵy Túrkistan oblysy ákimdiginiń ókilderinde «Ashyq esik kúni» qoǵamdyq qabyldaýy ótti. «Nur Otan» partııasynyń Túrkistan oblystyq fılıaly uıymdastyrǵan qabyldaýǵa Saıram, Qazyǵurt, Tólebı Saryaǵash, Keles, Ordabasy, Túlkibas jáne ózge de aýdan, qalalardyń turǵyndary kelip, ótinishteri men talaptaryn aıtty. Olardy oblys ákimdigine qarasty 23 basqarmanyń basshylary men orynbasarlary, Túrkistan oblysynyń polıtsııa departamenti men «Yrys» mıkroqarjy uıymynyń jaýapty ókilderi qabyldady.
Qoǵamdyq qabyldaýda 100-den astam turǵynnyń ótinishteri men shaǵymdary tyńdaldy. Olardyń arasynda ataýly áleýmettik kómek alý, jumyspen qamtý, kásipkerlikke grant alý, jer men baspana kezegi, bilim, medıtsına, ınfraqurylymǵa qatysty ótinishter kóp boldy. Osy arqyly óńirde qandaı salada másele kóp ekeni ańǵaryldy.
Osy qabyldaý barysynda Saryaǵash aýdanynda medıtsınalyq nysan, Qazyǵurt aýdanynda mektep qurylysy boıynsha jumystar júıelenetini belgili boldy. Sonymen birge ataýly áleýmettik kómek boıynsha kelgen kópbalaly analardyń da talaptary baqylaýǵa alyndy. Kanaldardy tazalaý, Arys qalasyndaǵy 2-3 úıdiń qurylysy jónindegi shaǵymdar da tıisti basqarmalardyń nazarynda bolmaq.
«Nur Otan» partııasy Túrkistan oblystyq fılıaly tóraǵasynyń birinshi orynbasary B.Tájibaev qoǵamdyq qabyldaýǵa turǵyndardyń kózqarasy jaqsy ekenin jetkizdi.
«30 qańtarda Túrkistan qalasynda osyndaı jalpy qabyldaý ótti. Búgin sol qabyldaýǵa kele almaǵan, Shymkentke jaqyn aýdandarda turatyn turǵyndar úshin «Ashyq esik kúni» qoǵamdyq qabyldaýyn osynda ótkizip otyrmyz. Barlyq basqarma basshylary shaqyryldy. Mundaı ashyq qabyldaýdae turǵyndardyń basshylarmen betpe-bet sóılesip, máseleni jyldam sheshýine septigin tıgizedi. Aldaǵy ýaqytta da basqarma basshylarymen aýdan, qalalardy aralap, kóshpely qoǵamdyq qabyldaýlar ótkizýdi jalǵastyramyz», – deıdi ol.
Búginde Túrkistan oblysynda partııanyń 17 qoǵamdyq qabyldaý bólmesi qyzmet etedi. 2019 jyldyń qorytyndysy boıynsha qoǵamdyq qabyldaý bólmelerine 9002 aryz-shaǵym kelip túsip, 4415-si /49%/ ońtaıly sheshilip, 4587-sine zań aıasynda keńes berilgen.
