Qoǵamdyq densaýlyqty saqtaý salasyndaǵy aıyppuldardyń mólsheri artty
NUR-SULTAN. QazAqparat - Elordanyń qoǵamdyq densaýlyq saqtaý departamentiniń basshysy Sádýaqas Baıǵabylov sanıtarlyq talaptardy saqtamaǵan kásipkerlerge qatysty ákimshilik jaýapkershilik kúsheıtilgenin jetkizdi, dep habarlaıdy QazAqparat departamenttiń baspasóz qyzmetine silteme jasap.
Qalalyq Qoǵamdyq densaýlyq saqtaý departamenti bıylǵy 1-toqsanda sanıtarlyq erejelerdi buzýǵa qatysty 342 tekserý júrgizip, kásipkerlik sýbektilerine jalpy somasy 6,7 mln teńge bolatyn 306 aıyppul saldy.
Aıta keteıik, 2019 jyldyń 11 sáýirinen bastap Ákimshilik quqyq buzýshylyq týraly kodekske sanıtarlyq erejeler men normalardy buzǵandarǵa salynatyn ákimshilik aıyppuldardy kóbeıtýge qatysty túzetýler kúshine enedi. Aıyppuldar orta eseppen 3 eseden 10 esege deıin artqan, keı máseleler boıynsha 1,5 ese kóbeıgen.
Atap aıtqanda, ýlanýǵa sebep bolmaǵan jaǵdaılar úshin jeke tulǵalarǵa 30 aılyq eseptik kórsetkish (buryn 10 AEK bolatyn), laýazymdy tulǵalarǵa, shaǵyn kásipkerlik sýbektileri nemese kommertsııalyq emes uıymdarǵa 230 AEK (buryn 20), orta kásipkerlik sýbektilerine 310 AEK (buryn 40), iri kásipkerlik sýbektilerine 1 600 AEK (buryn 120) mólsherinde aıyppul salynady.
Adam densaýlyǵyna zııan keltirgen jaǵdaılar úshin, eger onyń qylmystyq belgileri bolmasa, laýazymdy tulǵalarǵa, shaǵyn kásipkerlik sýbektileri nemese kommertsııalyq emes uıymdarǵa 460 AEK (buryn 300), orta kásipkerlik sýbektilerine 620 AEK (buryn 400) mólsherinde aıyppul salynady. Keı jaǵdaılarda, osyǵan qosa olardyń qyzmet júrgizýine tyıym salynýy nemese ónimderi tárkilenýi múmkin. Osy sanktsııalar boıynsha jeke tulǵalar men iri kásipkerlik sýbektilerine salynatyn aıyppuldar burynǵysha 200 jáne 2 000 AEK mólsherinde qaldy.
2019 jyldyń basynan 1 aılyq eseptik kórsetkish - 2525 teńge.
Nur-Sultan qalasynyń QDSD kásipkerlerdi sanıtarlyq erejeler men normalardy qatań saqtaýǵa shaqyrady. Bul másele kún jylyǵan kezde kúrdelene túsedi.
«Qarajattaryńyzdy aıyppul tóleýge emes, tehnologııalyq qondyrǵylardy, kommýnıkatsııalardy jańǵyrtýǵa jáne nysandaryńyzdy sanıtarlyq talaptarǵa sáıkestendirýge jumsańyzdar!», - delingen habarlamada.
