Qoǵamdyq densaýlyq saqtaý komıtetiniń tóraǵasy qyzylsha aýrýyna shaldyǵýdyń negizgi sebebin túsindirdi

ASTANA. QazAqparat - Qoǵamdyq densaýlyq saqtaý komıtetiniń tóraǵasy, bas sanıtar dáriger Jandarbek Bekshın qazirgi ýaqytta qoǵam nazaryn aýdarǵan qyzylsha aýrýyna qatysty túsinikteme berdi, dep habarlaıdy QazAqparat tilshisi.

Onyń aıtýynsha, qyzylsha aýrýynyń órshýiniń negizgi sebebiniń biri, ótken ǵasyrdyń 80-shi jyldarynyń aıaǵy men 90-shy jyldardyń basynda elimizge vaktsına jetkizýde kidiris boldy. Sol kezde azamattarǵa qajetti ekpe egilmeı, keıde ekinshi rettik ekpe jasalmaǵan jaǵdaı da kezdesti.

"Sondaı-aq, sol jyldary elimizde qyzylsha aýrýynyń tirkelýi joǵary tym joǵary boldy. 90-shy jyldardyń sońyna qaraı, ıaǵnı 6 jyl ótken soń, biz ımmýnıtetti jaqsartýǵa arnalǵan qaıta vaktsınatsııalaý jumysyn júrgizdik. Sol kezde jiberilgen olqylyqtardyń nátıjesi endi bilinip jatyr",-deıdi bas sanıtar.

Onyń sózine qaraǵanda, sol ýaqytta qyzylshaǵa qarsy ekpe almaǵan balalar men jasóspirimder búginde ata-ana bolatyn jasqa jetti.

"Sonyń saldarynan qazir Qazaqstanda balalar arasynda qyzylsha aýrýy jıi tirkelýde. Bizdiń esep boıynsha, qyzylshaǵa shaldyqqan balalardyń 56% ekpe jasyna jetpegender», - dedi ol OKQ-de ótken baspasóz máslıhatynda.

Aıta keter jaıt, atalǵan aýrýǵa tap bolǵandardyń negizgi bóligi, oǵan qarsy ýaqtyly ekpe jasatpaǵan azamattar.

Eske sala ketsek, J.Bekshın buǵan deıin Astanada qyzylshaǵa shaldyǵý jaǵdaıynyń 2 esege azaıǵanyn málim etken edi.