Qoǵamdyq damý mınıstrligi qoǵamdyq keńesterdi ózgertýdi usyndy
ASTANA. QazAqparat - Qoǵamdyq keńester jónindegi zańnamany jetildirý aıasynda qoǵamdyq keńesterdegi memlekettik organdardyń qatysýyn 10 paıyzǵa deıin qysqartý usynylýda. Bul týraly Qoǵamdyq damý vıtse-mınıstri Abzal Núkenov Parıj qalasynda (Frantsııa) ótken Ekonomıkalyq yntymaqtastyq jáne damý uıymy (EYDU) Sybaılas jemqorlyqqa qarsy júıesiniń plenarlyq otyrysynda aıtty, dep habarlaıdy QazAqparat.
Atalǵan mınıstirliktiń baspasóz qyzmetiniń habarlaýynsha, vıtse-mınıstr Abzal Núkenov óz sózinde qoǵamdyq keńesterdi jetildirý boıynsha qabyldanyp jatqan is-sharalar týraly baıandady. Ol qoǵamdyq keńester jónindegi zań jobasy tujyrymdamasynyń jobasy ázirlenip, QR Ádilet mınıstrligine engizilgenin atady. Ózgerister qoǵamdyq keńes múshelerin qalyptastyrý, rotatsııalaý, ókilettikterin toqtatý mehanızmderi jáne keńes qyzmetin qarjylaı, materıaldyq-tehnıkalyq qamtamasyz etý máselelerine qatysty bolady. Sonymen qatar, qoǵamdyq keńesterge memlekettik organdardyń qatysýyn 10 paıyzǵa deıin qysqartý usynylýda. Qoldanystaǵy zańnamaǵa sáıkes memlekettik organdardyń qoǵamdyq keńesterge qatysýy músheleriniń jalpy sanynyń úshten bir bóliginen aspaýy tıis.
EYDU sarapshylary óz kezeginde, Qazaqstanda qoǵamdyq keńesterdi jetildirý boıynsha qabyldanyp jatqan is-sharalarǵa oń baǵa berdi.
Sarapshylardyń pikirine qaraǵanda, bul ózgeris qoǵamdyq keńesterdiń maqsaty men mindetterine qatysty qoǵamnyń oń pikirin qalyptastyrady. Sonymen qatar, memlekettik organdar men turǵyndar arasyndaǵy suhbat alańy retinde qoǵamnyń senimin arttyrady.
EYDQ otyrysynyń negizgi maqsaty - sybaılas-jemqorlyqqa qarsy Stambýldyq is-qımyl josparyn taldaýdyń 4-shi kezeńi aıasynda Armenııa, Qyrǵyzstan jáne Ýkraınanyń taldaý esebin, sonymen qosa Ázerbaıjan, Qazaqstan, Grýzııa, Monǵolııa, Tájikstan, Ýkraına jáne Ózbekstan boıynsha aralyq esepterdi talqylaý jáne bekitý.
