Qoǵamdyq baqylaýdy kimder júrgize almaıdy - zań jobasy

ASTANA. QazAqparat – Májiliste «Qoǵamdyq baqylaý týraly» Zań jobasyna arnalǵan dóńgelek ústel otyrysy ótip jatyr, dep habarlaıdy QazAqparat tilshisi.

Qujatty Aqparat jáne qoǵamdyq damý vıtse-mınıstri Danııar Qadyrov tanystyrdy. Onyń aıtýynsha, qoǵam atynan baqylaý júrgizetin tulǵalardyń tizbesin aıqyndaý kózdelip otyr.

«Qoǵamdyq baqylaýdy iske asyrýǵa 18 jasqa tolmaǵan, ótelmegen sottylyǵy bar, psıhologııalyq nemese psıhıkalyq esepte turǵan adamdar júrgize almaıdy. Odan basqa, sheteldik qatysýy bar, sondaı-aq qoldanystaǵy zań boıynsha qyzmeti toqtatylǵan nemese tyıym salynǵan kommertsııalyq emes uıymdar shettetiledi», - dedi vıtse-mınıstr.

Sondaı-aq D.Qadyrov qujatta qoǵamdyq baqylaýdyń nazaryna qandaı mekemeler men tulǵalar kiretinin atady.

«Qoǵamdyq baqylaý obektileri – jergilikti memlekettik organ jáne atqarý organdary, memlekettik organ bolyp tabylmaıtyn memlekettik mekemeler, kvazımemleketttik sektor sýbektileri jáne qyzmeti qoǵamdyq múddelermen baılanysty ortalyq jáne jergilikti atqarýshy organdardyń fýnktsııalaryn oryndaýshylar.

Sýbektiler retinde Qazaqstanda tirkelgen azamattar, kommertsııalyq emes uıymdar jáne qoǵamdyq baqylaýdy iske asyrý quqyǵy nemese ókilettigi bar organdar men mekemeler aıqyndalyp otyr», - dedi Danııar Qadyrov.