Qoǵamdyq baqylaý týraly zańdy ázirleýde sarapshylardyń qaǵıdattyq ustanymy eskerildi - mınıstrlik

NUR-SULTAN. QazAqparat - Búgin onlaın túrde «Qoǵamdyq baqylaý týraly» zań jobasyn talqylaý boıynsha dóńgelek ústel ótti. Talqylaýǵa QR Aqparat jáne qoǵamdyq damý mınıstri Aıda Balaeva jáne QR Parlamentiniń depýtattary, sarapshylar, azamattyq qoǵam ókilderi qatysty, dep habarlaıdy QazAqparat vedomstvonyń baspasóz qyzmetine silteme jasap.

Aıda Balaevanyń aıtýynsha, ázirlengen zań jobasy – bul barlyq múddeli taraptar, sonyń ishinde sarapshylar, zańgerler, quqyq qorǵaýshylar, qoǵam qaıratkerleri kiretin jumys toby músheleriniń ujymdyq eńbegi. Sondaı-aq, ol zań jobasyn ázirleý kezinde qoǵam ókilderiniń qaǵıdattyq ustanymdary tolyq eskerilgenin atap ótti.

Zań jobasyna sáıkes qoǵamdyq baqylaýdy júzege asyratyn tulǵalar toby aıtarlyqtaı keńeıtilip, olardyń ishine Qazaqstan Respýblıkasynyń azamattary men kommertsııalyq emes uıymdar kirdi.

Sonymen qatar, qoǵam ókilderiniń usynystary boıynsha qoǵamdyq baqylaý obektileriniń tizbesine bıýdjet qarajatyn alatyn zańdy tulǵalar engen bolatyn.

Zań jobasynda qoǵamdyq baqylaýdyń birqatar mańyzdy qaǵıdalary bekitilgen, olardyń ishinde alýan túrli nysandar, adamnyń jáne azamattyń konstıtýtsııalyq quqyqtaryn, bostandyqtary men zańdy múddelerin saqtaý, jarııalylyq, ashyqtyq, qoǵamdyq baqylaýdy júzege asyrýdyń zańdylyǵy qamtylady.

Zań jobasyn talqylaý barysynda QR Adam quqyqtary jónindegi ýákili Elvıra Azımova zań jobasynyń azamattyq qoǵam úshin mańyzdylyǵyn jáne qoǵamdyq baqylaýdy zańnamalyq retteý qajettiligin atap ótti.

Zań jobasyn ázirleýshilerdiń habarynsha, atalǵan zań jobasynyń ereksheligi – ol memlekettik tilde ázirlenýinde. Zańdy ázirleýge L.N.Gýmılev atyndaǵy EUÝ Quqyq jáne salystyrmaly quqyqtaný ǴZI dırektory, zań ǵylymdarynyń kandıdaty Qazybek Dáýitálıev belsendi qatysýda.

«Zań jobasy qoǵamdyq baqylaýdy júzege asyrýdyń negizderin qamtıdy jáne qoǵam ókilderine qoǵamdyq baqylaýdy júzege asyrýǵa qatysýy úshin barlyq jaǵdaı jasaıdy», - dedi Q.Dáýitalıev.

QR Parlamenti Májilisiniń depýtaty Erlan Saırov zań jobasynyń sapaly ázirlengenin atap ótip, zań jobasy Parlament Májilisi qabyrǵasynda qoǵam ókilderiniń qatysýymen belsendi túrde talqylanatynyna senimin bildirdi.

Sondaı-aq, talqylaý barysynda belgili sarapshylar men azamattyq qoǵam ókilderi Aıgúl Soloveva, Záýresh Battalova, Rahym Oshaqbaev, Serik Berkamalov, Evgenıı Jovtıs jáne basqalar sóz sóıledi.

Іs-shara sońynda mınıstr kezdesýdiń barlyq qatysýshylaryna zań jobasyn ázirleýge belsendi qatysqandary úshin alǵys bildirdi.