Qoǵamdyq baqylaý toby salyq organdaryndaǵy kemshilikterdi baǵalaıdy

ASTANA. QazAqparat - Búgin QR Qarjy mınıstrligi Memlekettik kirister komıtetinde Qoǵamdyq baqylaý tobynyń alǵashqy otyrysy ótti, dep habarlaıdy QazAqparat.

Atap aıtqanda, Qoǵamdyq baqylaý toby (QBT) - memlekettik kirister organdarynda sybaılas jemqorlyqqa qarsy saıasatty baǵalaýdy júzege asyratyn keńes berý organy. Onyń quramyna azamattyq qoǵam ınstıtýtynyń ókilderi, bıznes, ǵylymı jáne zertteý uıymdarynyń qyzmetkerleri, qoǵam qaıratkerleri men BAQ ókilderi, blogerler endi.

«Osyndaı topty qurý ıdeıasyn erterekte qarastyrǵan bolatynbyz. Ókinishke qaraı, Komıtet tarapynan qabyldanǵan sharalarǵa qaramastan, búginde sybaılas jemqorlyq faktileri oryn alyp jatyr. Sondyqtan, qazirgi kezde qoǵamdyq monıtorıng tobyn qurý durys qadam dep sanaımyn», - dedi Memlekettik kirister komıtetiniń tóraǵasy Ardaq Teńgebaev.

Óz kezeginde Qoǵamdyq baqylaý tobynyń tóraǵasy Irak Elekeev eń basty jumys halyqtyń senimin arttyrýǵa baǵyttalatynyn atap ótti.

«Taǵy bir baǵytymyz halyq arasynda salyq mádenıetin kóterýge negizdelmek. Árqaısymyz dúkenderde, saýda oryndarynda kassa chegin alýymyz kerek. Alaıda adamdarǵa buǵan asa mán bermeıdi. Osynyń saldarynan janama esep-qısap júredi. Keıinnen salyqtyq túsim az dep shyǵymdanamyz. Sondyqtan halyqqa bul jaǵdaılardy barynsha túsindirý kerek. Memlekettik kirister komıtetinde atqarylyp jatqan jumystar ashyq ári jarııaly túrde kórsetiletin bolady. Osy oraıda tıisti jospardy Qoǵamdyq baqylaý tobynyń músherine berdik, sondaı-aq olar da óz kezeginde usynystaryn jasaıtyn bolady», - dedi I. Elekeev.

QBT-nyń negizgi qyzmeti - memlekettik kirister organdarynda sybaılas jemqorlyq sıpattaryna jol beretin sebepter men táýekelderdi taldaý. Sonymen qatar, baqylaý toby jumysynda saladaǵy máseleler boıynsha azamattardy qabyldaý ári ótinishterdi qaraý eskerilip otyr.