Qoǵamdyq baqylaý: Shý aýdandyq aýrýhanasyna 2 mln teńgeniń dári-dármegi jetkiziledi
«Keshe bizge Quralaı Batyrǵajına júginip, Jambyl oblysy Shý aýdany Tóle bı aýylyndaǵy aýdandyq aýrýhanada dári-dármekterdiń jetpeı jatqanyn habarlady. Biz jergilikti atqarýshy organdarǵa saýal-hat joldadyq. Al búgin Shý aýdanynyń ákimi Nurjan Kalenderev oblys ákiminiń tapsyrmasymen Shý aýdandyq aýrýhanasynyń jumysyn tekserdi. Nurjan Kalenderev medıtsıalyq personalmen sóılesip, usynystar men ótinishterdi tyńdady, aýrýhanaǵa túsken adamdardyń jaǵdaıyn talqylady», - dep jazdy Lıma Dıas «Qoǵamdyq baqylaý» resmı tobynyń Facebook paraqshasynda.
Onyń habarlaýynsha, qazirgi ýaqytta 150 adamǵa eseptelgen aýrýhanada 46 patsıent em alyp jatyr. Alty naýqas jansaqtaý bólimine ornalastyrylǵan. Aýdandyq aýrýhanada 6 jasandy tynys alý apparaty bar.
«Taıaý arada aımaq basshysynyń qoldaýymen taǵy 5 jasandy tynys alý apparaty jetkizilide. Sondaı-aq demeýshilerdiń esebinen 5 ottegi kontsentraty jetkiziledi. Medıtsınalyq mekemede «Geparın» preparaty jetispeı jatqan bolatyn. Ol problemany densaýlyq saqtaý basqarmasy «SK-Farmatsııa» kompanııasynyń fılıalymen sátti sheshti. Aýdandyq aýrýhanaǵa 2 mıllıon teńgeniń dári-dármek partııasy men antıbıotıkter, antıkoagýlıanttary búgin jetkiziledi», - deıdi ol.
Aıta keterligi 11 shildede QR Densaýlyq saqtaý mınıstri Alekseı Tsoı aýrýhanada emdelip jatqan naýqastarǵa dári-dármek jetpeı jatqany týraly áleýmettik jelide taraǵan vıdeoǵa qatysty jaýap bergen edi. Mınıstr medıtsınalyq uıymdardyń jumysyn qadaǵalaıtyn halyqtyq baqylaý quratynyn aıtqan.
Aqparat jáne qoǵamdyq damý mınıstriniń keńesshisi ári mınıstrlik tarapynan «Halyqtyq baqylaý» jobasynyń úılestirýshisi Lıma Dıastyń aıtýynsha, baqylaý eń aldymen dárigerlerge kómektesý úshin qolǵa alynǵan.
Aqparat jáne qoǵamdyq damý mınıstri Aıda Balaevanyń tapsyrmasymen «Qoǵamdyq baqylaý» aktsııasyna «QazAqparat» HAA aqparattyq qoldaý kórsetýde.
