Qoǵamdyq baqylaý medıtsınalyq uıymdarda jumysyn bastady
«Bir táýlikke jetpeıtin ýaqyt ishinde bizge júzden astam adam habarlasyp, qoǵamdyq baqylaý tobyna kirgisi keletinin aıtty. Kóbinese Qazaqstan aımaqtarynan aýdan ortalyqtary men aýyl turǵyndary habarlasty. Adamdar týystary men jaqyndary qandaı máselemen betpe-bet kelgenderi týraly jazyp jatyr. Kóptegen syn, usynystar jazylýda. Kóbinese dárigerlerdiń jumys jaǵdaıy, aýrýhanaǵa túsken naýqastardyń jaǵdaıy, elimizge kelgen gýmanıtarlyq kómektiń durys bólinýi týraly suraqtar qoıylýda», - deıdi qoǵamdyq baqylaý úılestirýshisi, Aqparat jáne qoǵamdyq damý mınıstriniń keńesshisi Lıma Dıas.
Onyń aıtýynsha, qazir qoǵamdyq baqylaý shtaby qurylýda.
«Biz uıymdastyrýdyń qıyn kezeńindemiz. Medıtsınalyq uıymdar, jergilikti ákimdik, qoǵamdyq keńes jáne úkimettik emes uıymdar arasyndaǵy baılanys mehanızmin jasap jatyrmyz. Erteń keshke deıin óńirlik úılestirýshiler tizimi jarııalanady. Sonymen qatar, qoǵam belsendilerin jeke qorǵaý quraldarymen qamtamasyz etý máselesin sheshýge tyrysýdamyz, sebebi adamdardyń qaýipsizdigi - birinshi másele», - deıdi ol.
Qoǵamdyq baqylaý tobynyń jumysyna halyq qalaýlylary da qatysqysy keletinin aıtyp ótý kerek. QR Parlament májilisiniń depýtaty Irına Smırnova da osy topqa qosylǵysy keletinin aıtty. Budan basqa da kóptegen qazaqstandyq qoǵamdyq baqylaý tobynda volonter bolǵysy keledi.
«Men Nur-Sultan jáne Qaraǵandy qalalarynda volonter bolýǵa daıynmyn. Ózim COVID-19-ben aýyrdym. Aýdıtor bolyp jumys isteımin. Qaı jerge kómek kerek sol jerge qol ushyn soza alamyn. Qoǵamdyq baqylaý tobyna kirip, aýrýhanada kómekteskim keledi», - dep jazdy qala turǵyny Aıjan Súleımenova.
«Qoǵamdyq baqylaý tobyna kirýge daıynmyn. Qurmetpen, Vladımır Prıvalov, Shymkent jáne Túrkistan oblysy, «Ońtústik Qazaqstan» gazetiniń tilshisi» dep jazdy taǵy bir nıet bildirýshi.
Eske sala ketsek buǵan deıin QR Densaýlyq saqtaý mınıstri Alekseı Tsoı aýrýhanada emdelip jatqan naýqastarǵa dári-dármek jetpeı jatqany týraly áleýmettik jelide taraǵan vıdeoǵa qatysty jaýap bergen edi. Mınıstr medıtsınalyq uıymdardyń jumysyn qadaǵalaıtyn qoǵamdyq baqylaý quratynyn aıtqan.
Sondaı-aq, Aqparat jáne qoǵamdyq damý mınıstriniń keńesshisi Lıma Dıas qazaqstandyqtardy Qoǵamdyq baqylaý tobyna qosylyp, medıtsınalyq uıymdarǵa monıtorıng júrgizýge shaqyrǵan bolatyn.
Lıma Dıas atalǵan topqa qosylý nemese usynys aıtý boıynsha joba úılestirýshisine habarlama nemese diaslimakz@gmail.com el.poshtasyna hat jazýǵa bolatynyn aıtty.
