Qoǵamdyq baqylaý áleýmettik shıelenistiń aldyn aldy – Saıda Taýkeleva

ALMATY. QazAqparat – Koronavırýs indeti kezinde Densaýlyq saqtaý mınıstrligi men Aqparat jáne qoǵamdyq damý mınıstrliginiń birikken jumysynyń arqasynda qurylǵan qoǵamdyq baqylaý uıymy áleýmettik shıelenistiń aldyn aldy. Osyndaı oıymen Qoǵamdyq baqylaýdyń Almatydaǵy úılestirýshisi Saıda Táýkeleva bólisti, dep habarlaıdy QazAqparat tilshisi.

Onyń aıtýynsha, qoǵamdyq baqylaý koronavırýs indeti beleń alǵan maýsym- shilde aılaryndaǵy qoǵamnyń ashyq saýaldaryna jaýap alý qajettiliginen týǵan.

Qalyń kópshiliktiń dári jetispeýshiligi, aýrýhanalardaǵy qıyndyqtar, oryn tapshylyǵy týraly ashynǵan oılary osy ınstıtýttyń qurylýyna túrtki boldy. Qurylǵanyna 1 aıdan asa ýaqyt bolǵan qoǵamdyq uıym qazir Qazaqstannyń barlyq qalalarynda jumys istep jatyr.

Ár qaladaǵy úılestirýshide 4 monıtorıng toby jumys isteıdi. Olar dárihana, medıtsınalyq mekeme, aýrýhana men emhanany tekseredi. Gýmanıtarlyq kómektiń tıisti orynǵa jetýin qadaǵalaıdy. Sonymen qatar, sanıtarııa talaptarynyń saqtalýyn baqylaıdy.

«Almaty ǵana emes, aımaqtarda da birqatar quqyqbuzýshylyq tirkeldi. Úılestirýshiler jergilikti ózin-ózi basqarý organdarymen, «SQ Farmatsııa» ókilderimen baılanysta. Eger, kez-kelgen uıymnyń jumysynan olqylyq anyqtalsa, uıym basshylarymen áńgime júrgiziledi. Bizdiń jumysymyzǵa sybaılas jemqorlyqqa qarsy is qımyl agenttiginiń ókilderi de belsene qatysady. Biz eń aldymen oblystyq nemese qalalyq densaýlyq saqtaý uıymdarynan málimet alamyz. Sosyn, sol tizimmen medıtsınalyq preparattardyń jetkizilýin tekseremiz», - dedi Saıda Táýkeleva.

Onyń paıymdaýynsha, qoǵamdyq baqylaýdyń qurylýy Qazaqstanda volonterlik qozǵalystyń damýyna tyń serpin berdi.

Munda qoǵamdyq uıymdardaǵy barlyq volonterlik birlestikterdiń kúshi bir arnaǵa toǵysqan.

«Bizdiń aramyzda lıder komandasy, ulttyq volonterler jelisi bar. Bizdiń basty mindetimiz - atqarylyp jatqan jumystardyń ashyqtyǵyn qamtamasyz etý. Bul jerde retteýshi organdar QR DSM men QR Aqparat jáne qoǵamdyq damý mınıstrligin atap ótý kerek. Olardyń qatysýymen kóptegen organdarǵa kirip, tekserýge múmkindik aldyq. Sonymen qatar, materıaldardy kópshilikke jarııa etýge múmkindik aldyq. Úsh jaqtap istelgen jumystyń arqasynda arada dıalog bar. Ár reıdten keıin biz akt toltyryp, retteýshi organ nemese jergiliktiózin ózibasqarý organy arqyly olqylyqty túzetýge kúsh jumsaımyz», - dedi ol.

Atqarylǵan jumystyń oń yqpal bergeni ras. Qazir burynǵydaı dárihanalarǵa tizilgen kezek joq. Aýrýhanalar men emhanalar dárimen tolyq qamtylǵan. MÁMS tarapynan kepildendirilgen kómek berilip jatyr.

«Meniń oıymsha, bul buryn-sońdy bolmaǵan oqıǵa. Az ýaqytta qoǵam memleketpen birige otyryp kópshilikke jarııa ári ashyq suhbatqa qol jetkizdi. Sonymen qatar, tekserý nátıjeleri kópshiliktiń nazarynda bolǵany úlken jeńis dep oılaımyn», - dedi S.Táýkeleva.

Az ýaqytta pármendi kúshke aınalǵan qoǵamdyq baqylaýǵa qazir elimizdiń kez kelgen óńirinen turǵyndar júginedi.

«Qoǵamdyq baqylaý halyq pen memlekettik qurylymdar arasyndaǵy aqparattyq kópir bolyp otyr desem artyq emes. Bizdiń jumysymyz jazalaýdy maqsat etpeıdi. Medıtsına qyzmetkerleri qandaı qıyndyqty bastan keshirip jatyr? Patsıentterdiń kókeıkesti problemalary nede? Osy suraqtarǵa jaýap izdeımiz. Qoǵamdyq baqylaýdyń arqasynda indettiń beleń alǵan kezinde týyndaǵan áleýmettik shıelenis óz sheshimin tapty», - dedi Saıda Táýkeleva.

Eske slaa ketsek, 11 shildede QR DSM basshysy Alekseı Tsoı elde medıtsınalyq uıymdardyń jumysyn baqylaıtyn táýelsiz uıym qurylatynyn aıtqan bolatyn. 15 shildede bul uıym jumysyn bastady.

QR Aqparat jáne qoǵamdyq damý mınıstri Aıda Balaevanyń tapsyrmasymen «Qoǵamdyq baqylaý» aktsııasyna «QazAqparat» HAA a qparattyq qoldaý kórsetedi.