Qoǵamdyq baqylaý: Aqtóbe oblysynda oqýshylardy kompıýtermen qamtý tolyq júzege aspaǵan
AQTÓBE. QazAqparat – Jańa oqý jylynda oqýshylardyń qashyqtan oqyp jatqandaryna 2 aıdaı ýaqyt ótti. Alaıda Aqtóbe oblysynda tender utqan kompanııa oqýshylardy kompıýtermen áli qamtamasyz etpegen, dep habarlaıdy QazAqparat.
Búgin, 20 qazanda Qoǵamdyq baqylaý úılestirýshisi men Sybaılas jemqorlyqqa qarsy kúres qyzmetkerleri Aqtóbe oblysyna ákelingen kompıýterdiń bir partııasyn qabyldap alý barysyn qadaǵalady.
Sybaılas jemqorlyqqa qarsy kúres qyzmetiniń ókili Janbolat Turtaevtyń aıtýynsha, ár noýtbýk oqýshy qolyna tımes buryn talapqa saı jınaqtalyp, mıkrofon, beınekamera syndy bólshekteriniń bolýy tekseriledi. Sosyn jumysqa jaramdy ekenine kóz jetkizgennen soń kompıýterler oqýshylarǵa tapsyrylady. Oblystyq bilim basqarmasy mamandarynyń aıtýynsha, tapsyrysty keshiktirip jetkizgeni úshin oryndaýshy kompanııany jaýapqa tartý maqsatynda sotqa júginbekshi. Al jaýapty kompanııa ókili tapsyrysty ýaqytynda oryndaýǵa karantınniń kesiri tıgenin aıtyp, aqtalýda.
Jalpy, oblys boıynsha 19146 kompıýterge qarajat bólinip, onyń 6710-y ákelingen. Tender utqan kompanııa ókili qalǵan kompıýterlerdi qazan aıynyń aıaǵyna deıin jetkizip beretinin málimdedi.
