Qoǵamdy, onyń sanasyn oıatýda «Qazaq» gazetiniń jasaǵany búgin de ózekti - O. Asanǵazy
Búgin Astana qalalyq Tilderdi damytý basqarmasy men «Rýhanııat» ortalyǵynyń uıymdastyrýymen ótken «Qazaq» gazetiniń 100 jyldyǵyna arnalǵan «dóńgelek ústel» barysynda májilis depýtaty Orazkúl Asanǵazy osylaı málim etti.
«Qazaq» gazetindegi maqalasynda qaıratker Mirjaqyp Dýlatuly aıtqan eken: «Jol uzaq, ǵumyr qysqa. Endeshe búgin artylǵan júkti qoldan kelgeninshe atqaryp keteıik» dep. Shyndyǵynda Alash zııalylary osy ult baspasózi arqyly kóp júkti arqalady. Qazaqtyń máńgilik el bolýyn murat etti. Al sol máńgilik el ıdeıasy kúni keshe Memleket basshysynyń Joldaýyna da arqaý boldy. Bir sózben aıtqanda Alash zııalylary ózderiniń qysqa ǵumyrynyń árbir sátin arnaǵan máseleler búgingi Táýelsiz Qazaqstannyń taǵdyryna dóp kelip, keleshek ulttyń peshenesine jazyldy», - dedi O. Asanǵazy.
Depýtattyń aıtýynsha, «Qazaq» gazeti ult máselesin arshyp aıtyp, ony keleshek urpaq aldyna da qoıyp ketti.
«Qazir ult máselesin ulttyń sanasyna jetetin deńgeıde kóterý de ózekti. Konstıtýtsııamyzda kóp dúnıe jan-jaqty qabyldandy, zańdar da jazyldy. Degenmen, atqarýshylyq turǵydan alǵanda qulyqtyń bolmaı jatqanyna da nazara aýdarǵan lázim. Bizdiń baqytymyz ult máselesin jeter jerine kóterip ketken «Qazaq» gazetiniń bolǵany. Sol úshin onda qyzmet etken qaıratkerlerdiń aty máńgi óshpeıdi», - dedi ol.
Sonymen qatar, Orazkúl Asanǵazy áli de atqarylatyn sharýalarǵa toqtala kele, memlekettik tildiń mártebelik turǵysynda biraz máseleler bolýy tıistigine nazar aýdartty. «Qoǵamdy, onyń sanasyn oıatýda «Qazaq» gazetiniń istegeni búgin de ózekti bolyp qalyp otyr. Biz osyndaı ulyq isterge de nazar aýdara alsaq ıgi edi», - dedi depýtat.
