Qoǵamdy masyldyq meńdep bara jatqan sııaqty - senator

ASTANA. QazAqparat - Qol-aıaǵy saý adamdarǵa qatysty qoldanystaǵy zańnamalyq aktilerdi qaıtadan qarap, múmkin, talabyn kúsheıtý qajet shyǵar. Mundaı pikirdi búgin Senattaǵy Elbasynyń azamattardy áleýmettik qorǵaý boıynsha bergen tapsyrmalarynyń oryndalýy qaralǵan Úkimet saǵatynda senator Sársenbaı Eńsegenov bildirdi, dep habarlaıdy QazAqparat tilshisi.

"Degenmen, onyń eki úlken máselesi bar, biri - masyldyq. Shyn máninde sońǵy kezderi osy másele etek alyp bara jatqandaı áser qaldyrady. Jaqynda ótken kezdesýde anyqtalǵany - úlken joldyń boıynda salynyp jatqan mektep qurylysyndaǵy jumysshylardyń 90 paıyzdan astamy ózbek memleketiniń azamattary. Qurylys mekemesiniń basshysy sol aýyldyń turǵyny. Ol kisiniń aıtýynsha, jergilikti turǵyndar jumysqa kelmeıdi. Qara jumysshynyń aılyǵy 90 myń teńge, sylaqshy mamandar 150 myń teńge alady. Mundaı aqshaǵa jergilikti turǵyndardyń jumys jasaýǵa yqylasy joq. Keıbireýleri "mundaı jalaqyǵa jumysqa barsaq, járdemaqydan qaǵylamyz" degen ýáj aıtady eken", - dedi ol.

Sondyqtan senator bul úlken máselege aınalyp turǵandyǵyn aıta kele qol-aıaǵy saý adamdarǵa qatysty qoldanystaǵy zańnamalyq aktilerdi qaıtadan qarap, múmkin talabyn kúsheıtken durys shyǵar degen oıyn jetkizdi.

"Al turǵyndar mundaı jaǵdaıdyń qalyptasýyna bizdiń bıznestiń yqylas-nıetiniń joqtyǵynan ekenin aıtady. Sebebi bıznes úshin shetelden kelgen ózbek azamattaryn jumysqa alý tıimdi. Olar kúni-túni jumys jasaıdy. Olarǵa artyq jumys jasaǵany úshin tólem jasaýdyń, áleýmettik tólemder tóleýdiń nemese eńbekke jaramsyzdyq tólemin tóleýdiń qajeti joq. Jergilikti turǵyndarmen bıznes ókilderi arasynda durys kelisimshart jasalmaıdy. "Eńbek zańy negizinen jumys berýshiniń quqyǵyn kózdep ketti, jumysshylardyń quqyǵy shekteýli" degen áńgimeler de aıtylýda. Muny bolashaqta zerdelep qarý kerek degen oıdamyn", - dedi Sársenbaı Eńsegenov.