Qoǵamdy áleýmettik jańǵyrtý jónindegi Elbasy bastamasyn zańnamalyq turǵydan qamtamasyz etý Parlamenttiń basty baǵyty bolmaq - Q. Mámı
ASTANA. 13 qyrkúıek. QazAqparat - Barsha qazaqstandyqtardyń qoldaýyna ıe bolǵan qoǵamdy áleýmettik jańǵyrtý jónindegi Elbasynyń bastamasyn zańnamalyq turǵydan qamtamasyz etý
osy sessııadaǵy Parlament qyzmetiniń basty baǵyty bolmaq. Búgin QR Parlamenti Senatynyń jalpy otyrysynda jıyndy ashqan palata tóraǵasy Qaırat Mámı osylaı málimdedi.
Sóz arasynda spıker Memleket basshysy ótken jolǵy Parlament sessııasyn ashý barysynda zań shyǵarýshy organnyń aldynda turǵan asa mańyzdy mindetterdi aıqyndaǵanyna toqtaldy. «Barsha qazaqstandyqtardyń qoldaýyna ıe bolǵan qoǵamdy áleýmettik jańǵyrtý jónindegi Elbasynyń bastamasyn zańnamalyq turǵydan qamtamasyz etý ústimizdegi sessııadaǵy zań shyǵarýshy qyzmetimizdiń basty baǵyty bolmaq. Sonymen qatar, úsh jyldyq merzimge arnalǵan respýblıkalyq bıýdjetti talqylaý barysynda bıýdjettik shyǵyndardyń tıimdiligine kóńil bólý kerek. Ásirese, qarjy tártibin nyǵaıtý, tıimsiz shyǵyndardy qysqartý, «kóleńkeli ekonomıkaǵa» qajetti zańnamalyq tosqaýyldar qoıý, sondaı-aq áleýmettik bastamalardy júzege asyrýǵa baǵyttalǵan qarajattardyń maqsatty jáne tıimdi paıdalanylýy únemi basty nazarda bolýy qajet», - dedi Q. Mámı.
Bul rette palata tóraǵasy qarapaıym qazaqstandyqtardy tolǵandyryp otyrǵan máselelerge kúni buryn nazar aýdarýdyń mańyzdylyǵyn aıtyp, paıda bolǵan túıindi máselelerdi der kezinde sheshý úshin qajetti zańdardyń ýaqytyly qabyldanýyna mán berý kerektigin de jetkizdi. «Eń bastysy zańdardyń halyq muqtajyn qanaǵattandyrýyna tikeleı baǵyttalýyn basa nazarda ustaýymyz kerek», - dedi spıker.
