Qoǵamdyq jumystardan jaltarǵandarǵa qatysty zań talaby kúsheıtildi
ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
- Zańda Parlament Májilisinde qaraý kezinde barlyq ortalyq memlekettik organdarmen, «Atameken» Ulttyq kásipkerler palatasy jáne úkimettik emes uıymdar ókilderiniń qatysýymen 2023 jylǵy 18 qazanynan bastap osy jyldyń 2 jeltoqsanyna deıin jumys tobynyń 34 otyrysy jáne 4 kóshpeli otyrys ótkizildi. Osy kezeńde Májilis depýtattary memlekettik organdardyń ókilderimen birlese otyryp, jumys toby aıasynda 500-den astam túzetýdi talqylady. Atqarylǵan jumystyń qorytyndysy boıynsha qazirgi ýaqytta zań jobasynyń Úkimettik redaktsııasy (189 túzetý) Parlament Májilisi depýtattarynyń 217 túzetýimen tolyqtyryldy. Onyń ishinde 211 pozıtsııa qabyldandy, al 6 pozıtsııa qabyldanbady, - dedi Májilis depýtaty Únzıla Shapaq.
Onyń aıtýynsha, qujat aıasynda qoǵamdyq jumystar túrindegi jańa ákimshilik jaza ınstıtýtyn iske asyrý tetigi aıtarlyqtaı pysyqtaldy, qoǵamdyq jumystardan jaltarǵan jaǵdaılardaǵy ishki ister organdarynyń róli kúsheıtildi.
- 2025 jyldyń 1 shildesinen bastap qylmystyq, azamattyq jáne ákimshilik ister boıynsha jańa kassatsııalyq sottar iske qosylady. Osyǵan baılanysty Ákimshilik quqyq buzýshylyq týraly kodeksine zań jobasy sheńberinde kassatsııalyq sotta júginý men qaıta qaraýdyń biryńǵaı qaǵıdalaryna baǵyttalǵan túzetýler qabyldandy. Atap aıtqanda, túzetýler daýdy máni boıynsha sheshetin sot aktileri apellıatsııadan keıin kúshine enýdi retteıdi. Qabyldaý úshin aldyn ala qaraýdy joıý usynylady, óıtkeni bári «úzdiksiz kassatsııa» qaǵıdaty boıynsha jumys isteýi kerek, ıaǵnı ister birden keminde 3 sýdıadan turatyn alqaly quramnyń qaraýyna túsýi qajet. Sonymen birge, kassatsııa úshin aqylǵa qonymdy merzimdi bekitýge baǵyttalǵan, biraq alty aıdan aspaıtyn túzetýler qabyldandy. Kodekstiń birqatar baptaryna qatysty Konstıtýtsııalyq Sottyń úsh normatıvtik qaýlysyn iske asyrý úshin túzetýler qabyldandy (2023 jylǵy 28 sáýirdegi № 12-NP, 2023 jylǵy 13 maýsymdaǵy №19-NP, 2023 jylǵy 3 qazandaǵy №31-NP)», - dedi depýtat.
Sonymen qatar, zańda «zańsyz baıý», ınvestorlarǵa qatysty daýlardy qaraý barysynda prokýrorlyq «súzgi» máselelerin retteıtin túzetýler de qamtyldy.