Qoǵamdyq uıymdardyń nagradalaryna talaptar kúsheıtiledi — Aıda Balaeva
ASTANA. KAZINFORM — Qoǵamdyq uıymdar tarapynan beriletin nagradalarǵa qoıylatyn talaptar kúsheıtiledi. Bul týraly Májilis depýtattaryna Premer-mınıstr Oljas Bektenovtiń jaýabynda aıtylǵan.
— «Qazaqstan Respýblıkasynyń memlekettik nagradalary týraly» Zańyna 2025 jylǵy mamyrda engizilgen ózgeristerge sáıkes, qoǵamdyq birlestikterge, qoǵamdyq qorlarǵa, basqa da úkimettik emes uıymdarǵa syrtqy túri men ataýy memlekettik nagradalarǵa tolyqtaı nemese qandaı da bir bóligi uqsas ordender men medaldardy, omyraýǵa taǵatyn belgiler men olarǵa qosa beriletin qujattardy taǵaıyndaýǵa jáne jasaýǵa tyıym salyndy. Sondaı-aq Qazaqstan Respýblıkasynyń, Qazaqstan halqynyń jáne Memleket basshysynyń atynan memlekettik emes nagradalarmen nagradtaýǵa jol berilmeıdi, — dedi vıtse-premer.
Osy oraıda ol Mádenıet jáne aqparat mınıstrligi elimizde tirkelgen 20 myńǵa jýyq qoǵamdyq uıymǵa turaqty túrde taldaý jáne monıtorıng jumystaryn júrgizetinin atap ótedi.
— Qazirgi ýaqytta ýákiletti organ Qazaqstan Respýblıkasynyń «Qoǵamdyq birlestikter týraly» jáne «Kommertsııalyq emes uıymdar týraly» zańdaryna qoǵamdyq birlestikterdiń, qoǵamdyq qorlardyń, basqa da úkimettik emes uıymdardyń nagradalaryna qatysty qoıylatyn talaptardy kúsheıtýge baǵyttalǵan ózgerister men tolyqtyrýlar engizý týraly» Zań jobasyn ázirledi. Zań jobasyn daıyndaý barysynda halyqaralyq jáne TMD elderiniń tájirıbelerine súıene otyryp, zertteýler júrgizildi. Qazirgi ýaqytta zań jobasy belgilengen tártipte pysyqtalýda. Jalpy saýalda kóterilip otyrǵan máseleler Memlekettik keńesshiniń tóraǵalyǵymen turaqty ótetin Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń basty nazarynda, — dedi Aıda Balaeva.
Aıta keteıik, taıaýda Premer-mınıstrdiń orynbasary — Mádenıet jáne aqparat mınıstri Aıda Balaeva Memleket basshysy Qasym-Jomart Toqaevtyń atynan mýzykalyq bilim berý salasynda eńbek etip júrgen birqatar azamatqa memlekettik nagradalar tabystady.
